Kompania e prodhimit Lionsgate ka publikuar trailerin e filmit “Day Drinker”, një triller i drejtuar nga Marc Webb, me protagonistë Johnny Depp, Penelope Cruz dhe Madelyn Cline.
Ky film pritet të shfaqet në kinema më 26 mars 2027. “Day Drinker” ndjek historinë e një baristeje në një jaht privat (Cline), e cila takon një mysafir misterioz (Depp).
Ky takim do ta ngatërrojë atë me një kriminel (Cruz) dhe do të krijojë lidhje të papritura mes tyre.
Në trailerin e ngacmueshëm, shohim Depp-in me flokë të thinjur duke thënë me një zë të frikshëm: “Historia ime?
Ndoshta është një histori hakmarrjeje ose ndoshta është diçka më e keqe.
Po sikur e gjitha kjo të jetë një histori fantazmash ose ndoshta unë jam thjesht një pijedashës tjetër?” Ky film do të jetë një nga të parët që e rikthen Depp-in në ekranin e madh pas gjyqit të tij në vitin 2022 kundër ish-gruas Amber Heard.
Po ashtu, filmi i tij i dytë, “Ebenezer” i Paramount, do të shfaqet në kinema më 13 nëntor. “Day Drinker” gjithashtu e rikthen Cruz në sistemin e studiove të Hollivudit, pasi ajo kishte një vit të suksesshëm me një sërë prodhimesh të pavarura si “La Bola Negra”, “The Invite” dhe “Bunker”.
Ky projekt është hera e parë që Cline kthehet në ekran që pas përfundimit të serialit “Outer Banks” në Netflix, ku ajo interpretonte Sarah Cameron, një rol që e bëri atë një yll në industri.
Burimi origjinal i informacionit: telegrafi .com
