Millian Radoiçiq: Qëndrimi i tij i paqartë pas sulmit të armatosur në Kosovë

0
2
- Advertisement -

Millian Radoiçiq, i cili është përgjegjës për udhëheqjen e sulmit të armatosur në veri të Kosovës më 2023, nuk u paraqit më 15 nëntor në stacionin policor të Savski Venacit në Beograd, siç është detyruar sipas vendimit të Gjykatës së Lartë në këtë qytet.

Këtë e raportoi më 17 nëntor Rrjeti Ballkanik i Gazetarisë Hulumtuese (BIRN), duke iu referuar burimeve të veta.

Gjykata e Lartë në Beograd i tha Radios Evropa e Lirë (REL) se nuk do të publikojë asnjë informacion që vjen nga policia. “Mbetemi në të njëjtin qëndrim që ju kemi dërguar dje”, thuhet në përgjigjen e gjykatës.

Bëhet fjalë për qëndrimin se Gjykata e Lartë në Beograd po mbikëqyr zbatimin e masës së shqiptuar ndaj Radoiçiqit, sipas së cilës ai duhet të paraqitet në polici, dhe se “në bashkëpunim me organet kompetente po ndërmerren të gjitha veprimet e parapara për kontrollin e respektimit të detyrimit të shqiptuar”.

REL-i u përpoq të kontaktonte edhe avokatin Goran Petronijeviq, i cili e përfaqëson Radoiçiqin, por ai nuk iu përgjigj telefonatave dhe mesazheve.

Radoiçiq, i cili kërkohet nga policia ndërkombëtare, INTERPOL, për organizimin e sulmit të armatosur në Banjskë të Kosovës, është nën hetime nga Prokuroria e Lartë Publike në Serbi.

- Advertisement -

Ndërkohë, prokurorët në Kosovë i kanë ngarkuar 45 persona për këtë sulm, në të cilin mbeti i vrarë një rreshter i Policisë së Kosovës.

Tre prej sulmuesve janë dënuar, ndërsa të tjerë të dyshuar, përfshirë Radoiçiqin, janë në arrati.

Në kohën e sulmit në Banjskë, Radoiçiq ishte nënkryetar i Listës Serbe, partisë kryesore të serbëve në Kosovë, e cila deri më tani ka vepruar me mbështetje nga Partia Përparimtare Serbe dhe ish-presidenti i Serbisë, Aleksandar Vuçiq.

Që nga tetori i vitit 2023, Radoiçiq ka pasur për detyrë të paraqitet në stacionin policor më datat 1 dhe 15 të çdo muaji, ndërsa pasaporta i është konfiskuar.

Sipas deklarimeve të mëhershme të Gjykatës së Lartë, ai e ka përfillur këtë masë deri më tani.

Megjithatë, më 13 nëntor, në publik u shfaqën pretendime jozyrtare se Radoiçiq ishte arratisur në Rusi.

Radoiçiq është, gjithashtu, nën sanksionet e Shteteve të Bashkuara të Amerikës dhe të Mbretërisë së Bashkuar, për shkak të akuzave për krim të organizuar dhe korrupsion.

Ai u pa për herë të fundit në publik para zgjedhjeve të 25 tetorit në Serbi, kur mori pjesë në tubimin parazgjedhor të Partisë Përparimtare Serbe në Kragujec.

Më herët, nga Serbia është larguar Zvonko Vesellinoviq, biznesmen nga veriu i Kosovës dhe deri vonë bashkëpunëtor i Radoiçiqit.

Sipas konfirmimit që REL-i mori nga burime të sigurisë në Bosnje e Hercegovinë, ai udhëtoi me aeroplan nga Sarajeva drejt Turqisë më 11 nëntor, duke përdorur pasaportën serbe.

Me të ishte edhe vëllai i tij, Zharko Vesellinoviq.

Të dy, sikurse Radoiçiqi, janë nën sanksionet amerikane, për shkak të akuzave për krim të organizuar dhe korrupsion.

Burimi origjinal i informacionit: zeri .info

- Advertisement -

LEAVE A REPLY

Please enter your comment!
Please enter your name here