Dy ministri kanë nxjerrë raporte që analizojnë dështimin institucional që çoi në një tragjedi për Arlinda Zekajn.
Pas Ministrisë së Drejtësisë dhe asaj të Punëve të Brendshme, tani Ministria për Punë dhe Familje është duke pritur një raport që shqyrton veprimet e Qendrës për Punë Sociale në Pejë.
Sipas Andin Hotit, ky raport pritet të përfundojë brenda disa ditësh, ndërkohë që po shqyrtohet edhe roli i Qendrës në Gjilan pas një ngjarjeje të rëndë që rezultoi me vdekjen e dy personave, përfshirë një foshnjë.
Ai tha: “Ditën që ka ndodhë rasti, divizioni i inspektimit ka shkuar në Pejë e ka marr komplet dosjen, i ka intervistuar edhe zyrtarët që punojnë në qendrën për punë sociale dhe në Gjilan me rastin që ndodhi para do dite fatkeqësisht foshnjen e vogël, raporti ende nuk ka përfunduar nuk e kemi raportin përfundimtar ka disa të gjetura që smundem me i thanë pa përfunduar raporti.” Në lidhje me masat që do të merren nga gjetjet eventuale, ministri Hoti theksoi se vendimi i takon organeve lokale, konkretisht kryetarit të komunës.
Ai shtoi: “Divizioni i inspektimit e ka për detyrë me shiqu a po implementohen politikat në kuadër të qendrave për punë sociale, por masat që ne mund të marrim nuk janë të mëdhaja sepse ne cka bëjmë me raportin përfundimtar e qon te kryetari i komunës së Pejës, dhe kërkon nga ai të ndërmarr masa disiplinore ndaj zyrtarëve të QPS-së, tash varet nuk po them prej vullnetit sepse ai e ka obligim ligjor por nuk mundem unë me ndërhy.” Qendrat për punë sociale në Kosovë vazhdojnë të hasin probleme të shumta, duke përfshirë mungesën e stafit dhe kushteve të punës.
Kontakti me këto qendra shpesh është i vështirë, ndaj Yll Bokshi, avokat në komunën e Gjakovës, ka krijuar një ueb-faqe që ofron numrat kontaktues dhe informacione të tjera për to.
Ai thekson rëndësinë e reformimit të këtyre qendrave, duke shprehur nevojën për ndryshime të domosdoshme. “Duhet me pas me ndrru baza ligjore me u ndry gjithë procesi me u shty punëtorët social këtu në Kosovë.
Sa kam informacion, nuk ka strehimore, nuk ka jetimore që i thojnë, ka organizata joqeveritare që i organizojnë ato që marrin fondacione prej shtetit.
Ish dasht me qenë dicka në kuadër të shtetit… Këtu në Kosovë derisa duhet me vdek dikush ose me ndodh naj skandal për me reflektu, shpresoj që ngjarjet e fundit të jenë pasqyrë për me reflektu dhe në mënyrë urgjente me u bë reforma..”, ka thënë Yll Bokshi.
Ministria e Punës dhe Familjes gjithashtu ka përpiluar një raport për Qendrën për Punë Sociale në Lipjan, pas një rasti të rëndë keqtrajtimi të një fëmije 5 vjeçar, për të cilin vetëm një zyrtar është suspenduar, ndërsa komuna nuk ka ofruar informacione të tjera në lidhje me rekomandimet e dhëna.
Po ashtu, komuna ka qenë e heshtur edhe ndaj kërkesave të mediave për të sqaruar më shumë rreth masave dhe rekomandimeve të dala nga raporti.
Burimi origjinal i informacionit: zeri .info
