Një 38-vjeçar është arrestuar në Nevşehir të Turqisë, pasi dyshohet se e goditi me shuplakë nga prapa një grua që ishte duke pritur jashtë një supermarketi.
Si pasojë e këtij sulmi, gruaja pësoi humbje të dëgjimit në veshin e majtë.
Ngjarja ndodhi në lagjen Kapucubaşı, ku i dyshuari, i identifikuar si Tolga Çelik, iu afrua nga prapa viktimës, S.E., dhe e goditi me shuplakë në veshin e majtë.
I gjithë incidenti u regjistrua nga kamerat e sigurisë.
Pas sulmit, gruaja iu drejtua policisë për të paraqitur ankesën e saj.
Gjatë marrjes në pyetje, Çelik mohoi se kishte sulmuar qëllimisht, duke pretenduar se krahu i tij e kishte goditur aksidentalisht.
Megjithatë, ekzaminimet mjekësore konfirmuan se gruaja kishte pësuar humbje të dëgjimit.
Sipas raportit mjekësor, lëndimi nuk mund të trajtohej përmes një ndërhyrjeje të thjeshtë mjekësore, ndonëse nuk përbënte rrezik për jetën.
