Qeveria britanike ka bërë të ditur kategoritë e emigrantëve që do të kenë mundësinë të përfitojnë qëndrimin e përhershëm në Mbretërinë e Bashkuar pas pesë vjetësh, pavarësisht një reforme të re që parashikon zgjatjen e afatit standard në 10 vjet.
Sipas njoftimit të Ministrisë së Brendshme britanike, të publikuar më 2 nëntor 2026, përjashtimet përfshijnë mjekët, infermierët, mësuesit dhe disa kategori të tjera të punonjësve të sektorit publik, po ashtu si punëtorët e kujdesit social që përmbushin kushtet e përcaktuara nga qeveria.
Ministrja e Brendshme, Shabana Mahmood, ka njoftuar se punëtorët e kujdesit social që kanë respektuar kushtet e vizës dhe kanë realizuar të ardhura minimale prej 25 mijë paundësh në vit do të mund të aplikojnë për qëndrim të përhershëm pas pesë vjetësh.
Ky përjashtim është i vlefshëm për ata që kanë hyrë në këtë skemë para publikimit të dokumentit të politikave të emigracionit në maj të vitit 2025.
Ky vendim është nxitur nga kundërshtimet e deputetëve të Partisë Laburiste, sindikatave dhe organizatave që përfaqësojnë sektorin e kujdesit social, të cilët kishin paralajmëruar se zgjatja e pritjes deri në 15 vjet për këtë kategori do të kishte një ndikim negativ te mijëra punëtorë që tashmë jetojnë dhe punojnë në Britani.
Pesë vjet do të jetë gjithashtu afati për ata që fitojnë mbi 50.271 paundë në vit, si dhe për profesionistët e caktuar në sektorët e shëndetësisë dhe arsimit, duke përfshirë mjekët, infermierët dhe mësuesit.
Ndërkohë, ata me të ardhura vjetore mbi 125.141 paundë dhe disa kategori të talenteve të jashtëzakonshme do të kenë mundësinë të aplikojnë pas vetëm tre vjetësh.
Për emigrantët e tjerë, përfshirë ata që fitojnë më pak se 50 mijë paundë në vit dhe nuk përfshihen në kategoritë e përjashtuara, periudha standarde e pritjes për marrjen e qëndrimit të përhershëm do të rritet nga pesë në 10 vjet.
Ministria e Brendshme ka përcaktuar disa kushte që do të vlejnë për të gjithë aplikuesit.
Ata duhet të kenë dëshmi të pastër penale, të zotërojnë gjuhën angleze në nivel të avancuar, të mos kenë borxhe ndaj shtetit britanik dhe të dëshmojnë së paku tri vjet kontribute në sigurimet kombëtare.
Për punëtorët e kujdesit social që nuk i kanë përmbushur kushtet e vizës, qeveria ka paraparë një mundësi tjetër: aplikimin për një vizë të re pesëvjeçare, pa qenë të lidhur me punëdhënësin e mëparshëm.
Pas përfundimit të kësaj periudhe, ata do të mund të aplikojnë për qëndrim të përhershëm nëse i plotësojnë kriteret.
Reforma e njohur si “Earned Settlement” pritet të zbatohet gjatë vitit 2027 dhe do të ndryshojë mënyrën se si emigrantët fitojnë të drejtën për të jetuar përgjithmonë në Britani.
Për qytetarët shqiptarë dhe kosovarë që punojnë në Mbretërinë e Bashkuar, kjo nënkupton se mundësia për të marrë qëndrimin pas pesë vjetësh do të varet nga profesioni, të ardhurat, koha e hyrjes në skemën përkatëse dhe përmbushja e kushteve të reja.
