Përveç Prishtinës, një protestë për drejtësi dhe përgjegjësi lidhur me rastin e Arlinda Zekajt do të mbahet edhe në qytetin e Pejës këtë të premte.
Protesta është e planifikuar për orën 12:00 dhe do të zhvillohet në sheshin “Skënderbe” në Pejë.
Pjesëmarrësit pritet të kërkojnë drejtësi për Arlinda Zekajn, e cila humbi jetën nga ish-kunati i saj, pas problemeve me ish-bashkëshortin.
Protestat në Prishtinë janë shoqëruar me kërkesa për përgjegjësi dhe llogaridhënie për vrasjen e Zekajt.
Pjesëmarrësit kanë kërkuar jo vetëm suspendimin e zyrtarëve, por edhe dorëheqje dhe shkarkime të atyre që janë përgjegjës.
Mes kërkesave të protestuesve janë edhe dorëheqjet e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla.
Kuvendi i Kosovës ka themeluar një komision parlamentar për të hetuar nëse kishte mungesë veprimesh nga institucionet e sigurisë dhe drejtësisë në lidhje me vrasjen e Arlinda Zekajt.
Autoritetet kanë pezulluar gjithashtu 13 zyrtarë që ishin marrë me rastin e saj për dhunë në familje.
Zekaj dyshohet se u vra nga kunati i saj më 25 tetor, ndërsa bashkëshorti i saj ishte në ndalim për kanosje ndaj saj.
Vrasja e saj, e cila ndodhi pavarësisht thirrjeve të saj të vazhdueshme për mbrojtje, ka shkaktuar një zemërim të madh dhe protesta në vend.
Në një seancë të enjten, Kuvendi miratoi me 90 vota për, asnjë kundër dhe asnjë abstenim komisionin hetimor me 11 anëtarë, i cili ka për detyrë të zbardhë lëshimet e dyshuara të institucioneve në rastin e 49-vjeçares nga Vitomirica e Pejës.
Komisioni është i obliguar të përgatisë një raport përfundimtar me gjetjet e hetimit dhe t’ia paraqesë Kuvendit brenda gjashtë muajve nga data e themelimit.
Ky komision është rezultat i një rezolute që Kuvendi miratoi për hetimin e vrasjes së Zekajt dhe parandalimin e dhunës ndaj grave.
Burimi origjinal i informacionit: zeri .info
