Kampionati spanjoll, La Liga, ka sjellë një risi të rëndësishme këtë sezon, duke i intervistuar gjyqtarët para kamerave televizive para ndeshjeve.
Kjo qasje inovative, e iniciuar nga Komisioni i Gjyqtarëve, është implementuar prej disa javësh dhe është raportuar nga gazetarët e mediave që kanë të drejtat e transmetimit.
Tani, La Liga dhe Komisioni i Gjyqtarëve po shkojnë një hap më tej.
Përveç intervistave para ndeshjeve, do të kemi mundësinë të dëgjojmë gjyqtarët edhe pas përfundimit të ndeshjeve.
Kjo do të jetë hera e parë në historinë e futbollit spanjoll dhe do të ndodhë këtë fundjavë, kur të paktën dy gjyqtarë do të flasin përpara kamerave.
Sipas DAZN, një nga ndeshjet ku do të dëgjojmë komentet e gjyqtarit është derbi bask.
Pas ndeshjes Athletic Bilbao – Real Sociedad, e cila fillon të dielën në orën 21:00 në San Mames, gjyqtari kryesor do të bëjë një deklaratë për mediat.
