Ministria e Punëve të Brendshme ka krijuar grupin punues për hartimin e Projektligjit për Pensionimin e Parakohshëm të personelit policor në Policinë e Kosovës.
Sipas vendimit të siguruar, ky akt është nënshkruar më 29 tetor 2026 nga ministri i Punëve të Brendshme, Xhelal Sveçla.
Grupi punues do të udhëhiqet nga zëvendësministri i Punëve të Brendshme, Viktor Buzhala, ndërsa zëvendësudhëheqës është Qëndrim Bytyqi, nga Departamenti Ligjor i MPB-së.
Në përbërje të grupit janë edhe përfaqësues të tjerë të Ministrisë së Punëve të Brendshme, institucioneve përkatëse dhe Policisë së Kosovës, duke përfshirë përfaqësues nga departamentet dhe njësitë e ndryshme institucionale.
Sipas pikës së tretë të vendimit, gjatë hartimit të projektaktit, nëse paraqitet nevoja dhe bazuar në vlerësimin e udhëheqësit të grupit punues, mund të ftohen edhe përfaqësues të institucioneve të tjera dhe ekspertë.
Vendimi përcakton se udhëheqësi i grupit punues do të administrojë procesin e konsultimeve paraprake dhe publike, do të përgatisë draftin fillestar dhe dokumentacionin përcjellës, si dhe do t’i dorëzojë ato në Departamentin Ligjor për procedim të mëtejshëm dhe miratim.
Po ashtu, të gjitha njësitë përkatëse të Ministrisë së Punëve të Brendshme dhe zyrtarët janë të obliguar të bashkëpunojnë dhe të ofrojnë të dhënat e kërkuara nga grupi punues.
Në vendim thuhet se ai hyn në fuqi ditën e nënshkrimit.
Megjithatë, vendimi ka të bëjë me themelimin e grupit punues për hartimin e projektligjit dhe nuk përcakton ende kriteret konkrete, moshën e pensionimit apo përfitimet që mund të parashihen për pjesëtarët e Policisë së Kosovës.
Burimi origjinal i informacionit: zeri .info
