Capital T Mbështet Protestat në Shqipëri dhe Zbulon Bisedën me Policinë

Reperi i njohur kosovar, Capital T, para disa ditësh shprehu publikisht mbështetje për protestat në Shqipëri, duke u bërë thirrje mediave në Kosovë që t’u kushtojnë më shumë vëmendje zhvillimeve dhe zërit të qytetarëve në protestë.

Në një postim në rrjetet sociale, artisti theksoi rëndësinë e gazetarisë së pavarur dhe raportimit pa censurë, duke nënvizuar se mediat kanë përgjegjësinë të informojnë publikun për çështjet me interes të përgjithshëm.

Pas këtij reagimi, portali shqiptar Dosja.al publikoi një audio-incizim të një telefonate mes reperit dhe një personi të identifikuar si oficer i Policisë së Tiranës.

Sipas Dosja.al, e cila pretendon se e ka siguruar incizimin, oficeri Niko Kurti e ka telefonuar artistin për ta pyetur se ku ndodhej dhe kur planifikonte të kthehej në Tiranë.

Gjatë bisedës, Capital T, emri i vërtetë i të cilit është Trim Ademi, i tha bashkëbiseduesit se ndodhet në Shtetet e Bashkuara të Amerikës dhe se ende nuk ka një datë të caktuar për kthimin e tij.

Në një moment të telefonatës, oficeri i kërkon reperit të mos e mbyllë telefonin dhe më pas e pyet nëse është Trim Ademi.

Sipas përmbajtjes së publikuar nga Dosja.al, oficeri i thotë artistit se dëshiron ta pyesë për një çështje të caktuar, por se biseda duhet të zhvillohet personalisht dhe jo përmes telefonit.

Në fund të telefonatës, ai i kërkon Capital T-së që, pasi të kthehet nga Amerika, ta kontaktojë sërish në numrin nga i cili po e telefononte dhe të paraqitet në vendin e tij të punës për të biseduar nga afër.

Burimi origjinal i informacionit: telegrafi .com