Njëmbëdhjetë njerëz janë hospitalizuar si pasojë e lëndimeve nga një zjarr që e ka përfshirë një ndërtesë shumëkatëshe banimi në kryeqytetin e Shqipërisë, Tiranë, të martën, njoftuan autoritetet.
Drejtori i Urgjencës Kombëtare, Skënder Brataj, tha se personat e hospitalizuar nuk janë në rrezik për jetën.
Zjarri nisi rreth orës 17:00 në ndërtesën pranë Qendrës Spitalore Universitare “Nënë Tereza” dhe u vu nën kontroll rreth tre orë më vonë.
Fasada e pallatit mori flakë tërësisht deri në katin e 12-të dhe depërtoi edhe brenda në banesa, para se të vihej nën kontroll.
Ende nuk dihet shkaku i zjarrit.
Drejtori i shërbimit zjarrfikës, Arben Cara, tha se zjarri u lokalizua dhe nuk u përhap në pallate e ndërtesa të tjera përreth.
Dy banorë të evakuuar kanë marrë ndihmë mjekësore për asfiksi, ndërsa disa zjarrfikës kanë plagë djegie.
Ministria e Mbrojtjes tha se 26 pjesëtarë të ushtrisë janë angazhuar në operacionin e shuarjes së zjarrit.
Ekipet e emergjencës ndërhynë duke i larguar disa banorë të ngecur në ndërtesë.
Policia zgjeroi perimetrin e sigurisë për të evituar përhapjen e flakëve edhe brenda banesave.
