Protesta qytetare kundër investimit të planifikuar në Zvërnec vazhdoi pasditen e sotme në kryeqytet, duke shënuar ditën e 133-të radhazi.
Si gjithmonë, qytetarët u mblodhën fillimisht në sheshin “Skënderbej” dhe më pas marshuan përgjatë Bulevardit “Dëshmorët e Kombit”.
Me pankarta në duar dhe thirrje për dorëheqjen e kryeministrit Edi Rama, protestuesit vazhduan të artikulojnë kërkesat e tyre për largimin e ashtuquajturës “kastë” e vjetër politike.
Aktivistët e shoqërisë civile, në sheshin përpara godinës së kryeministrisë, përsëritën kundërshtimin e tyre ndaj investimeve turistike në zonën e Zvërnecit, si dhe ndaj politikave për zonat e mbrojtura dhe investimeve strategjike.
Aktivisti Arben Kola i bëri thirrje SPAK dhe BKH që të veprojnë dhe të arrestojnë politikanët e korruptuar. “133 ditë vetëdije kombëtare.
Një thirrje për ambasadorin amerikan.
Populli shqiptar dhe ai amerikan janë të lidhur me njëri-tjetrin dhe Shqipëria kërkon ndihmë për çlirimin e Shqipërisë nga narkoshteti dhe shitja e armëve”, tha ai.
Një nga protestuesit u shpreh nga podiumi para Kryeministrisë se nuk duhet të njihet asnjë vendim që del nga parlamenti, të cilin e konsideroi si “Kuvend të krimit”.
Protestuesi theksoi se bashkitë e shkrira duhet të vazhdojnë punën dhe të mos pyesin për vendimet e një parlamenti të shitur.
Protesta, e cila filloi më 31 maj si kundërshtim ndaj projektit të investimit në zonën e Zvërnecit, është zgjeruar gjatë javëve në vijim edhe me kërkesa politike dhe institucionale.
Burimi origjinal i informacionit: zeri .info
