Policia e Kosovës ka njoftuar se ka ndërmarrë të gjitha masat e nevojshme operacionale për mbarëvajtjen e protestës së paralajmëruar nga Organizata e Veteranëve të Luftës së UÇK-së, e cila pritet të mbahet sot në orën 12:00 në sheshet e Prishtinës.
PK ka bërë të ditur se e njeh të drejtën e qytetarëve për të protestuar në mënyrë të qetë dhe demokratike, ndërsa zyrtarët policorë do të angazhohen për garantimin e sigurisë së pjesëmarrësve dhe ruajtjen e rendit publik.
Sipas Policisë, zyrtarët kompetentë kanë zhvilluar takim koordinues me përfaqësuesit e Organizatës së Veteranëve të Luftës, lidhur me organizimin e protestës dhe masat e sigurisë.
Policia u ka bërë thirrje pjesëmarrësve që të respektojnë ligjin dhe udhëzimet e zyrtarëve policorë, si dhe të tregojnë kujdes e maturi gjatë protestës. ‘Mos hidhni gjësende e mjete të forta, mos përdorni maska dhe kontribuoni që protesta të zhvillohet në mënyrë të qetë dhe të sigurt’, thuhet në njoftimin e PK-së, transmeton Zeri.info.
Ndërkohë, për shkak të protestës dhe lëvizjes së pjesëmarrësve, Policia ka paralajmëruar kufizime ose ndërprerje të përkohshme të qarkullimit në disa rrugë që çojnë drejt shesheve të kryeqytetit.
Për menaxhimin e trafikut, sipas nevojës, do të angazhohen edhe njësitë policore të trafikut, të cilat mund të bëjnë riorientimin e qarkullimit në rrugë alternative.
Policia ka thënë se zyrtarët e saj do të jenë të pranishëm në terren gjatë gjithë aktivitetit, duke theksuar se siguria e qytetarëve dhe mbarëvajtja e protestës mbeten prioritet.
Burimi origjinal i informacionit: zeri .info
