Organizata Botërore Meteorologjike (OBM), agjenci e specializuar e Organizatës së Kombeve të Bashkuara (OKB), ka paralajmëruar se një fazë e re e fenomenit klimatik ‘El Nino’ mund të nisë brenda javëve në vijim dhe të intensifikohet gjatë pjesës së mbetur të vitit 2026.
Meteorologët paralajmërojnë se kombinimi i ngrohjes globale me një El Nino të fuqishëm mund të sjellë pasoja të rëndësishme në shumë rajone të botës.
Sipas disa agjencive kombëtare të motit, ekziston mundësia që fenomeni i ri të shndërrohet në një nga El Nino-t më të fortë të regjistruar ndonjëherë, duke marrë përmasat e një të ashtuquajturi ‘super El Nino’.
Ekspertët po monitorojnë vazhdimisht kushtet klimatike në Paqësor, pasi ndryshimet në këtë rajon luajnë një rol vendimtar në zhvillimin e fenomenit dhe në ndikimin që ai mund të ketë në shkallë globale.
El Nino është një fenomen natyror klimatik që shfaqet periodikisht kur ujërat sipërfaqësore në pjesën qendrore dhe lindore të Oqeanit Paqësor ngrohen më shumë se niveli normal.
