Kryeministri i Kosovës, Albin Kurti, ka njoftuar se Qeveria e Kosovës do të vazhdojë të ofrojë mbështetje për krerët e Ushtrisë Çlirimtare të Kosovës në procesin e Apelit në Dhomat e Specializuara në Hagë.
Gjatë mbledhjes së Qeverisë, Kurti theksoi se pasnesër do të kalojë një muaj nga aktgjykimi ndaj ish-krerëve të UÇK-së, të cilin e konsideroi si një vendim të mbështetur në baza historike dhe faktike të pasakta. “Siç kemi bërë prej fillimit të këtij procesi, Qeveria do të vazhdojë të mbështesë, me mjetet që ka në dispozicion, të akuzuarit në procesin e Apelit, ku presim korrigjimin e kësaj padrejtësie”, tha Kurti.
Ai nënvizoi se për mbrojtjen e tyre është e nevojshme një strategji e mirorganizuar, e cila duhet të mbështetet në një analizë të thellë të procesit. “Për mbrojtjen e tyre duhet një strategji e mirëmenduar.
Fillimisht duhet një analizë e thellë që të veprojmë përpara.
Në Apel na duhet suksesi dhe për këtë gjë na duhet organizim dhe strategji shtetërore e kombëtare”, shprehu Kurti.
Ai gjithashtu informoi se gjatë mbledhjes së sotme do të merret një vendim të cilin e cilësoi si të rëndësishëm në këtë drejtim.
Burimi origjinal i informacionit: zeri .info
