Përtej bukurisë, skandaleve dhe famës së pakrahasueshme, Marilyn Monroe mbetet një nga figurat më misterioze të kulturës pop edhe një shekull pas lindjes së saj.
Kur përmendet emri i Marilyn Monroe, shumica kujtojnë menjëherë flokët bionde, buzëqeshjen ikonike dhe skenën legjendare me fustanin e bardhë që ngrihet mbi grilat e metrosë.
Por, 100 vjet pas lindjes së saj, Marilyn vazhdon të mbetet shumë më tepër sesa një simbol bukurie apo një yll i Hollywood-it.
Ajo ishte një nga gratë e para që e kuptoi se fama nuk ishte vetëm talent apo paraqitje, por një formë pushteti.
Në një epokë kur aktoret kontrolloheshin nga studiot dhe producentët, Marilyn Monroe arriti të krijojë një identitet që vazhdon të jetojë edhe sot, dekada pas vdekjes së saj.
E lindur më 1 qershor 1926 si Norma Jeane Mortenson, jeta e saj nisi larg luksit dhe shkëlqimit që më vonë do ta bënin ikonë globale.
Fëmijëria e vështirë, jetimoret dhe mungesa e stabilitetit familjar lanë gjurmë të thella në personalitetin e saj.
Megjithatë, pikërisht nga ajo pasiguri lindi nevoja për të krijuar një version të ri të vetes – Marilyn Monroe.
