Ministri i Financave, Hekuran Murati, ka njoftuar se Kosova ka ulur kufirin e pagesave me para të gatshme ndërmjet bizneseve nga 500 në 300 euro.
Kjo masë ka për qëllim të parandalojë financimin e paligjshëm dhe të rrisë gjurmueshmërinë e transaksioneve financiare.
Ai e bëri këtë deklaratë gjatë një aktiviteti të organizuar nga Ministria e Financave në kuadër të Procesit të Berlinit për financat e paligjshme, titulluar “Beyond Compliance – Ndërtimi i ekonomive të qëndrueshme përmes integritetit financiar”. “Ky është thelbi i temës së sotme, ‘Përtej përputhshmërisë me rregullat’.
Natyrisht, rëndësi ka të kemi ligjet e duhura dhe të përmbushim standardet ndërkombëtare, por ligjet në letër nuk tregojnë nëse sistemi funksionon vërtet.
Prova e vërtetë qëndron në atë që ndodh më pas.
Dëshiroj të ndaj shkurtimisht me ju disa nga masat që po ndërmarrim në Kosovë.
Një nga mënyrat më të thjeshta për të vepruar, një masë që mund të zbatohej relativisht lehtë, ishte trajtimi i çështjes së pagesave me para të gatshme.
Këto pagesa zakonisht nuk mund të gjurmohen, ose gjurmimi i tyre është i vështirë, dhe ato mund të përdoren për financim të paligjshëm”, tha Murati.
Duke folur për masat që po ndërmerren në Kosovë në fushën e integritetit financiar, Murati sqaroi se për transaksionet ndërmjet bizneseve dhe konsumatorëve, kufiri i pagesave me para të gatshme është 2.000 euro, ndërsa pjesa tjetër duhet të realizohet përmes transaksioneve të gjurmueshme në institucione financiare të licencuara në vend. “Ne e kemi ulur kufirin e pagesave me para të gatshme ndërmjet bizneseve nga 500 në 300 euro.
Ndërsa për transaksionet ndërmjet bizneseve dhe konsumatorëve, kufiri i pagesave me para të gatshme tani është 2.000 euro.
Pjesa tjetër mund të kryhet, ose duhet të kryhet, përmes një transaksioni të gjurmueshëm në një institucion financiar të licencuar në vend.
Përveç kësaj, së fundmi ka pasur zhvillime edhe në fushën e përgjegjësisë së Bankës Qendrore.
Ajo ka ndërmarrë hapa për të vënë nën kontroll dhe për të licencuar edhe operatorët e këmbimit që përdorin kriptovaluta.
Kjo, natyrisht, mund të ndihmojë që pagesat dhe transaksionet të bëhen digjitale, të gjurmueshme dhe më transparente.
Në këtë mënyrë, mbështetet edhe konkurrenca e ndershme dhe ndihmohet kalimi i më shumë aktivitetit ekonomik në ekonominë formale, aty ku i takon.
Megjithatë, asnjë masë e vetme, asnjë institucion dhe, aq më pak, asnjë shtet nuk mund ta bëjë këtë i vetëm.
Paratë e përfituara në mënyrë të paligjshme kalojnë shumë lehtë përtej kufijve, prandaj edhe bashkëpunimi ynë duhet të jetë po aq i lehtë dhe efikas”, tha ai.
Burimi origjinal i informacionit: zeri .info
