Ministri i Digjitalizimit dhe Administratës Publike, Lulëzon Jagxhiu, ka njoftuar se është përfunduar shtrirja e rrjetit falas të internetit “Wi-Fi for Western Balkans” në 33 komuna të Kosovës, duke e bërë të disponueshëm në gjithsej 43 lokacione publike.
Në këtë kontekst, Jagxhiu theksoi se rrjeti tashmë po përdoret nga qytetarët, me mbi 1.1 milion lidhje të regjistruara përmes këtij projekti.
Vetëm në Bibliotekën Kombëtare të Kosovës, sipas tij, janë regjistruar më shumë se 14 mijë lidhje brenda rreth gjashtë javësh.
Ai theksoi se ky projekt është pjesë e përpjekjeve për transformimin digjital të vendit dhe për të siguruar një qasje më të lehtë në internet për të gjithë qytetarët.
Gjithashtu, Jagxhiu përmendi zgjerimin e shërbimeve elektronike përmes platformës e-Kosova, e cila aktualisht ofron mbi 330 shërbime për qytetarët dhe bizneset.
Me e-Kosova 2.0, synohet të shtohen 400 shërbime të tjera gjatë dy vjetëve të ardhshëm.
Burimi origjinal i informacionit: zeri .info
