Këshilli Kombëtar Shqiptar (KKSH) ka bërë thirrje sot në Beograd për rikthimin e programit të policisë multietnike, rritjen e përfaqësimit të shqiptarëve në polici, si dhe për angazhimin e drejtpërdrejtë të Komisarit të Lartë të OSBE-së për Pakicat Kombëtare në adresimin e çështjes së pasivizimit të adresave.
Këto kërkesa janë paraqitur nga Alban Alili, përfaqësues i KKSH-së, gjatë një konferencë ndërkombëtare të organizuar nga Misioni i OSBE-së, Ministria e Punëve të Brendshme të Serbisë dhe Zyra e Komisarit të Lartë për Pakicat Kombëtare.
Konferenca shënoi përvjetorin e 20-të të rekomandimeve për punën e policisë në shoqëritë multietnike.
Në fjalën e tij, Alili theksoi se, pavarësisht marrëveshjeve dhe angazhimeve për integrimin e shqiptarëve, përfaqësimi i tyre në polici ka pësuar rënie.
Sipas të dhënave të raportuara nga KKSH, numri i policëve shqiptarë ka rënë nga 239, sa ishin evidentuar gjatë viteve 2010-2012, në 152, sipas një vlerësimi jozyrtar për fundin e vitit 2025.
Në Bujanoc, numri i policëve shqiptarë është ulur nga 107 në 56.
KKSH ka shprehur shqetësimin se pensionimi i brezit të policëve të punësuar përmes programit multietnik, pa rekrutime të reja, do ta zvogëlojë më tej praninë e shqiptarëve në polici.
Këshilli ka kërkuar që përfaqësimi i shqiptarëve të përfshijë edhe pozita drejtuese dhe policinë kufitare, në përputhje me rekomandimet e Komisarit të Lartë.
Gjatë konferencës u diskutua gjithashtu për përdorimin e gjuhës shqipe në komunikimin me policinë, mungesën e përkthyesve profesionistë dhe nevojën për krijimin e vendeve të sistematizuara të punës për përkthyes në Preshevë, Bujanoc dhe Medvegjë.
Alili iu drejtua Komisarit të Lartë duke kërkuar përfshirjen e tij në çështjen e pasivizimit të adresave.
KKSH ka kërkuar gjithashtu një shqyrtim të pavarur të rasteve të kontestuara, korrigjimin e vendimeve që i konsideron të padrejta dhe rikthimin e të drejtave të cenuara.
Në përfundim, KKSH mirëpriti bashkëpunimin me OSBE-në dhe Drejtorinë për Trajnimin Policor për takimet me të rinjtë shqiptarë gjatë muajit qershor, duke kërkuar që këto aktivitete të vazhdojnë me përgatitjen e kandidatëve dhe rekrutime konkrete në polici. “Pas një çerek shekulli marrëveshjesh dhe njëzet vjetësh rekomandime, shqiptarët kanë të drejtë të presin rezultate konkrete.” Burimi origjinal i informacionit: zeri .info
