Asociacioni i Gazetarëve të Kosovës (AGK) ka prezantuar gjetjet kryesore mbi Lirinë e Medias, Sigurinë e Gazetarëve dhe Gjuhën e Urrejtjes në Kosovë, ku u vlerësua se gazetarët vazhdojnë të përballen me sulme, kërcënime dhe presione, veçanërisht në hapësirën digjitale, ndërsa u ngrit shqetësimi për përkeqësimin e mjedisit për gazetarinë e pavarur.
Në këtë aktivitet u tha se sulmet ndaj gazetarëve, gjuha e urrejtjes, polarizimi politik dhe mosfunksionimi efikas i mekanizmave ligjorë po ndikojnë negativisht në lirinë e medias dhe sigurinë e gazetarëve në Kosovë.
Kryetari i AGK-së, Xhemajl Rexha, tha se siguria e gazetarëve vazhdon të cenohet në forma të ndryshme, veçanërisht në hapësirën online.
Profesori Jeton Mehmeti, i cili prezantoi gjetjet e Raportit të Monitorimit të Gjuhës së Urrejtjes, tha se gjetja kryesore është normalizimi i komunikimit agresiv dhe stigmatizues.
Duke prezantuar rezultatet e hulumtimit, Mehmeti tha se polarizimi politik dominon diskursin e dëmshëm në Kosovë.
Ai shtoi se raporti ka evidentuar edhe intensifikim të sulmeve ndaj gazetarëve.
Menaxherja e Programit në Lëvizjen FOL, Burbuqe Kastrati, tha se siguria e gazetarëve vazhdon të mbetet e brishtë.
Duke folur për zhvillimet ligjore që ndikojnë në lirinë e medias dhe sigurinë e gazetarëve, Yll Zekaj tha se problem mbetet zbatimi i ligjit dhe trajtimi i padive SLAPP.
Getoarbë Mulliqi, e cila prezantoi gjetjet e Indeksit të Lirisë së Medias dhe Sigurisë së Gazetarëve 2025, tha se shqetësimi kryesor lidhet me kushtet në të cilat punojnë mediat në Kosovë.
Burimi origjinal i informacionit: zeri.info
