Bashkimi Evropian ka alokuar afro 170 milionë euro për Kosovën, në kuadër të Planit të Rritjes, për gjysmën e dytë të vitit 2026.
Por Kosova rrezikon t’i humbë një shumë të konsiderueshme të këtyre mjeteve, nëse vazhdon kriza politike dhe mosfunksionimi i institucioneve shtetërore.
Ajo mund t’i përfitojë mjetet financiare nga BE-ja vetëm nëse i ndërmerr reformat e domosdoshme.
Komisioni Evropian (KE) paralajmëron se zvarritja e formimit të institucioneve të reja, pas zgjedhjeve të parakohshme parlamentare të qershorit, mund të ketë pasoja të drejtpërdrejta në zbatimin e reformave dhe në qasjen e Kosovës në fondet e BE-së.
Zëdhënësi i KE-së, Guillaume Mercier, thekson se vonesat në formimin e institucioneve mund të pengojnë reformat e rëndësishme dhe të ndikojnë në aftësinë e Kosovës për të përfituar plotësisht nga mundësitë e ofruara nga BE-ja.
Ndërsa Komisioni Evropian vlerëson raportimin e Kosovës për hapat reformues, situata politike në vend ka ndikuar në ritmin e zbatimit dhe ka kufizuar përparimin në reforma kyçe.
Kosova duhet të sigurojë funksionimin efektiv të institucioneve dhe konsensusin politik për të ruajtur financimin në dispozicion dhe për të mbajtur fokusin në zbatimin e agjendës së reformave.
Nëse nuk përmbushen 27 hapat reformues, Kosova rrezikon humbjen e fondeve të BE-së, duke përfunduar në një situatë të rrezikshme për stabilitetin ekonomik dhe politik të vendit.
Burimi origjinal i informacionit: zeri .info
