Çështja e ish-drejtuesve të Ushtrisë Çlirimtare të Kosovës, së bashku me pretendimet e ngritura gjatë viteve ndaj tyre, ishte temë qendrore në fjalimin e nënkryetarit të Kuvendit të Kosovës, Ardian Gola, në Asamblenë Parlamentare të Këshillit të Evropës.
Gola u ndal te proceset gjyqësore që lidhen me ish-pjesëtarët e UÇK-së, duke theksuar se disa nga pretendimet kryesore të raportit të Dick Martyt, sipas tij, nuk janë vërtetuar gjatë këtyre proceseve.
Ai përmendi në veçanti akuzat për krime kundër njerëzimit, trafikim organesh dhe çështjet që lidhen me të ashtuquajturën “Shtëpia e Verdhë”.
Në lidhje me akuzat që ende janë në proces, numri dy i Parlamentit shprehu besimin se vendimi mund të ndryshojë në fazën e apelit, nëse, siç tha ai, zbatohen me rigorozitet standardet ndërkombëtare të drejtësisë. “Ne besojmë fuqishëm se Paneli i Apelit do t’i rrëzojë ato, nëse i zbaton me rigorozitet standardet ndërkombëtare të drejtësisë, dhe udhëheqësit e UÇK-së do të jenë të lirë”, deklaroi Gola para të pranishmëve.
Në fjalimin e tij, ai e përshkroi UÇK-në si një forcë që, sipas tij, u shfaq si përgjigje ndaj dekadave të shtypjes në Kosovë.
Ai theksoi se qëllimi i luftës së saj ishte çlirimi i vendit nga regjimi i atëhershëm i Sllobodan Millosheviqit.
Gola gjithashtu u bëri thirrje institucioneve evropiane që të tregojnë kujdes ndaj zhvillimeve në rajon dhe të jenë të vëmendshme ndaj narrativave që, sipas tij, mund të çojnë në “shtrembërimin dhe përmbysjen e të vërtetave historike”.
Burimi origjinal i informacionit: zeri .info
