Turki Alalshikh ka bërë një deklaratë befasuese për këngëtaren shqiptare, Dua Lipa, gjatë një konference për shtyp për promovimin e superduelit mes Tyson Fury dhe Anthony Joshua.
Dy boksierët britanikë u përballën për herë të parë të mërkurën në mbrëmje, pas konfirmimit zyrtar të duelit shumë të pritur javën e kaluar.
Gjatë konferencës, Alalshikh, një nga figura kryesore në organizimin dhe financimin e kësaj përballjeje, komentoi mbi procesin e përzgjedhjes së stadiumit ku do të zhvillohet meçi.
Fillimisht, Madison Square Garden në New York dhe Wembley në Londër ishin përmendur si mundësi, por tashmë është konfirmuar se dueli do të zhvillohet në Principality Stadium në Cardiff të Uellsit.
Duke shpjeguar vendimin për stadiumin, Alalshikh bëri një koment të papritur për Dua Lipën, duke thënë se këngëtarja nuk do të performonte në Londër. “Do të jem i sinqertë.
E di që Londra nuk do të ma jepte stadiumin deri në orën 2 të mëngjesit dhe e di që Dua Lipa nuk do të performonte në stadium, sepse nuk i pëlqen boksi dhe ndoshta nuk më pëlqen as mua,” deklaroi Alalshikh.
Burimi origjinal i informacionit: telegrafi .com
