Personeli amerikan në bazën ajrore RAF Lakenheath, një nga bazat kryesore ushtarake të SHBA-së në Mbretërinë e Bashkuar, ka marrë urdhër për t’u strehuar në ambiente të sigurta për shkak të dyshimeve për praninë e dronëve të paautorizuar.
Sipas Sky News, Forcat Ajrore Amerikane konfirmuan se ekipet e sigurisë kanë reaguar ndaj aktivitetit të dyshimtë mbi bazën, pa raportuar të lënduar apo dëme materiale. “Këtë mbrëmje, personeli i sigurisë së Forcave Ajrore Amerikane reagoi ndaj aktivitetit të dyshuar të dronëve të paautorizuar mbi RAF Lakenheath.
Asnjë person, avion apo objekt i infrastrukturës nuk u prek”, deklaroi një zëdhënës i Forcave Ajrore Amerikane.
Ai theksoi se autoritetet amerikane po punojnë ngushtë me institucionet britanike për të garantuar sigurinë e personelit ushtarak, civilëve dhe familjeve të tyre.
Kjo ngjarje ndodhi vetëm disa ditë pasi ushtria amerikane zhvendosi më shumë se 12 avionë luftarakë nga baza RAF Mildenhall, gjithashtu në Suffolk, për shkak të kërcënimeve të sigurisë të lidhura me Iranin.
Të paktën dy prej këtyre avionëve u transferuan në RAF Lakenheath.
Muajin e kaluar, SHBA-ja kishte zhvendosur gjithashtu bombarduesit e saj nga baza RAF Fairford, pas raportimeve për kërcënime të tjera që ishin të lidhura me Iranin, duke i kthyer avionët në territorin amerikan.
