Real Madridi vazhdon ta ketë në fokus Michael Olisen, me presidentin Florentino Perez që shpreson të realizojë transferimin e yllit të Bayern Munichut në verën e vitit 2027.
Sipas raportimeve nga L’Equipe, drejtuesit e klubit madrilen janë ende të interesuar për shërbimet e sulmuesit 24-vjeçar, i cili ka kontratë me Bayern deri në qershor të vitit 2029.
Megjithatë, realizimi i këtij transferimi do të varet edhe nga situata e Vinicius Juniorit në ‘Santiago Bernabeu’.
Interesimi i Real Madridit për Olisen nuk është i ri; klubi spanjoll kishte shqyrtuar mundësinë e transferimit të tij edhe gjatë verës së kaluar, por Bayern nuk pranoi të hynte në negociata.
Sipas informacionit, drejtuesit bavarezë kishin theksuar se as një ofertë prej 500 milionë eurosh nuk do t’i ndryshonte pozitat e tyre.
Në fund, Real Madridi zgjodhi të investojë te Yan Diomande, i transferuar nga RB Leipzig.
Sulmuesi nga Bregu i Fildishtë ka fituar më shumë hapësira në ndeshjet e fundit, duke ofruar një alternativë shtesë për madrilenët gjatë mungesës së Viniciusit.
Megjithatë, Olise vazhdon të jetë një nga futbollistët më të preferuar nga drejtuesit e klubit mbretëror.
Sipas L’Equipe, edhe Kylian Mbappe, Ibrahima Konate dhe Eduardo Camavinga, gjatë grumbullimeve me Përfaqësuesen e Francës, kanë biseduar me bashkëkombësin e tyre për mundësinë e transferimit në Madrid.
Paraqitjet e Olises në Gjermani janë një tjetër arsye pse Bayerni dëshiron ta mbajë atë sa më gjatë në skuadër.
Francezi, sezonin e kaluar, regjistroi 15 gola dhe 19 asistime në Bundesliga, ndërsa në edicionin aktual vazhdon të jetë një nga lojtarët kryesorë të ekipit.
Pikërisht për këtë arsye, Bayern Munichu po përgatitet t’i ofrojë atij një kontratë të re.
Drejtori ekzekutiv i klubit, Jan-Christian Dreesen, ka konfirmuar se e ardhmja e futbollistit do të diskutohet me të, ndërsa synimi është të sigurojnë vazhdimësinë e tij para se kontrata aktuale të hyjë në dy vitet e fundit.
Vlera e Olises në tregun e transferimeve është rreth 180 milionë euro, ndërsa një marrëveshje e mundshme mund të kalojë shifrën e 200 milionë eurove.
Francezi iu bashkua Bayernit në vitin 2024 nga Crystal Palace për rreth 53 milionë euro dhe kontrata e tij nuk përmban klauzolë lirimi.
Një rol të rëndësishëm në këtë çështje mund të ketë edhe e ardhmja e Vinicius Juniorit.
Braziliani ka kontratë me Real Madridin deri në vitin 2032, por ndryshimet në konkurrencën për një vend në formacion mund të ndikojnë në situatën e tij.
Nëse ai vendos të largohet nga klubi, madrilenët mund ta rishikojnë strategjinë e tyre për repartin ofensiv dhe ta konsiderojnë më seriozisht transferimin e Olises.
Kështu, vera e vitit 2027 mund të jetë momenti kur Real Madridi do të provojë sërish të sigurojë shërbimet e francezit.
