Dërguarit e Donald Trump, Jared Kushner dhe Steve Witkoff, kanë folur pas takimit me Volodymyr Zelenskyn në Dublin.
Kushner, dhëndri i Trump-it, e përshkroi bisedën me Zelenskyn si “shumë të mirë”, duke theksuar se ajo shërbeu si një “përmbledhje e dobishme e ngjarjeve të tre ditëve të fundit”.
Kushner dhe Witkoff mbërritën në Dublin direkt nga Moska, pas bisedimeve me Vladimir Putinin.
Zhvillimi kryesor atje ishte dakordësia e Putinit që vendet evropiane të marrin pjesë në bisedimet e ardhshme të paqes.
Para kësaj, të dërguarit amerikanë morën pjesë në bisedime trepalëshe paqeje në Abu Dabi, në Emiratet e Bashkuara Arabe.
Kushner e cilësoi finalizimin e shkëmbimit të të burgosurve si një “arritje shumë të rëndësishme”.
Ai gjithashtu përmendi bisedën me Putinin, duke thënë se presidenti rus është “të paktën i gatshëm” “ta provojë” mundësinë që kombet evropiane t’u bashkohen bisedimeve të paqes. “Njerëzit dëshirojnë që kjo luftë të marrë fund”, shtoi Kushner, duke theksuar se “potenciali i Ukrainës është i jashtëzakonshëm”. “Po bëhet përparim i konsiderueshëm”, theksoi Kushner, lidhur me garancitë e sigurisë për Ukrainën në rast se lufta përfundon.
Megjithatë, ai nuk dha detaje të mëtejshme se çfarë nënkupton saktësisht kjo.
Ndërsa Steve Witkoff, i dërguari tjetër i Trump-it, shtoi: “Presidenti Trump është i vendosur të marrë drejtimin për t’i dhënë fund kësaj lufte”.
