Zëvendëskryeministri i parë dhe ministri i Punëve të Jashtme, Glauk Konjufca, ka shpjeguar arsyet e mungesës së progresit në disa fusha të evidentuara në Raportin e Progresit të Bashkimit Evropian për Kosovën.
Ai tha se periudha e mbulimit të raportit është karakterizuar nga tri palë zgjedhje dhe bllokadë institucionale.
Në seancën e jashtëzakonshme të Kuvendit, të thirrur me kërkesë të LDK-së, Konjufca theksoi se gjatë periudhës nga shtatori 2025 deri në shtator 2026, Kosova është përballur me dy palë zgjedhje të parakohshme dhe zgjedhje komunale, ndërsa Kuvendi ka qenë jofunksional për pjesën më të madhe të kohës.
Ai sqaroi se Qeveria ka qenë në detyrë gjatë kësaj periudhe, gjë që ka ndikuar në implementimin e reformave. “Komisioni Evropian e ndërlidh drejtpërdrejt ngadalësimin e reformave me bllokadën politike, e cila ka kufizuar efektivitetin e qeverisjes dhe i ka vonuar reformat strukturore”, deklaroi Konjufca.
Ai shpjegoi se Kuvendi ka punuar vetëm nga mesi i shkurtit deri në fund të prillit, ndërsa gjatë kësaj periudhe ka pasur edhe një ndërprerje prej tri javësh, nga 6 deri më 25 mars.
Megjithatë, Konjufca vlerësoi se niveli i përgatitjes së Kosovës për integrim evropian nuk ka pësuar rënie në asnjë fushë. “Megjithatë, pasqyra e përgjithshme tregon se niveli i përgatitjes nuk kishte rënë në asnjë fushë.
Në luftën kundër krimit të organizuar, niveli i përgatitjes është ngritur”, tha ai.
Ai theksoi se, krahasuar me raportin e vitit 2025, progresi është vlerësuar më mirë në të paktën shtatë kapituj, duke përfshirë reformën e administratës publike, lëvizjen e lirë të kapitalit, shërbimet financiare, statistikat, politikat rajonale, drejtësinë, lirinë dhe sigurinë.
Gjithashtu, përmendi përmirësimin e vlerësimit në dimensionin e lirisë së shprehjes.
Sipas Konjufcës, disa fusha kanë treguar ngadalësim të ritmit të reformave, por kjo nuk do të thotë se ka pasur rënie të nivelit të përgatitjes.
Në fund, ai kritikoi mënyrën se si LDK-ja e ka paraqitur përgjegjësinë e Qeverisë për gjetjet e raportit. “Kërkesa e LDK-së për këtë seancë e paraqet Qeverinë sikur të kishte pasur kompetenca të plota, duke neglizhuar bllokadën në të cilën ndodheshim”, theksoi Konjufca.
Burimi origjinal i informacionit: zeri .info
