Fisnik Asllani i është bashkuar Kombëtares së Kosovës në një moment të shkëlqyer forme, me shpresën se kjo do të vazhdojë edhe në ndeshjet ndaj Izraelit dhe Irlandës.
Sulmuesi kosovar ka marrë pjesë sot në stërvitjen e Dardanëve, ku është shfaqur me humor dhe një vetëbesim të jashtëzakonshëm pas paraqitjes së shkëlqyer me Hoffenheimin në fundjavë.
Asllani ishte protagonist në fitoren 2-1 ndaj Schalkes, duke shënuar një gol dhe duke dhuruar një asistim.
Një paraqitje e tillë e bën edhe më inkurajuese ardhjen e tij në grumbullimin e Kosovës, në prag të dy ndeshjeve të rëndësishme të Ligës së Kombeve.
Sulmuesi e nisi ndeshjen si titullar dhe që në minutën e 10-të arriti të shënonte, duke përfituar nga një gabim i portierit kundërshtar, Loris Karius.
Kontributi i tij vazhdoi edhe në minutën e 26-të, kur asistoi për Tim Lemperlen, i cili shënoi golin e dytë të Hoffenheimit.
Skuadra e tij fitoi 2-1, ndërsa Asllani ishte ndër futbollistët më të dalluar të takimit.
Paraqitja e tij mori vëmendje edhe në mediat gjermane, të cilat e veçuan për ndikimin e tij të drejtpërdrejtë në të dy golat e skuadrës.
Për sulmuesin e Kosovës, ky ishte një tjetër konfirmim i formës së mirë që po kalon në Bundesligë.
Asllani e kishte mbyllur grumbullimin e kaluar me Kosovën me një gol të rëndësishëm ndaj Austrisë, duke zhvilluar një paraqitje shumë të mirë.
Tani ai rikthehet te Dardanët pas një tjetër fundjave pozitive në futbollin gjerman, duke besuar se edhe ndaj Izraelit dhe Irlandës do të jetë protagonist.
Forma e tij, goli dhe asistimi ndaj Schalkes, si dhe atmosfera e mirë me të cilën i është bashkuar ekipit, janë sinjale inkurajuese për përzgjedhësin Franco Foda.
Asllani pritet të jetë një prej alternativave të rëndësishme në repartin ofensiv të Kosovës.
Dardanët fillimisht do ta presin Izraelin më 14 nëntor në stadiumin “Fadil Vokrri”, ndërsa më 17 nëntor do të përballen me Irlandën në Dublin.
Në këto dy ndeshje, Kosova synon ta mbyllë sa më mirë këtë cikël të Ligës së Kombeve, me pozitën e dytë që mbetet objektivi real i Dardandëve.
