Nënkryetarja e Prishtinës, Besianë Musmurati, ka prezantuar sot dokumentacionin dhe kronologjinë e projektit për menaxhimin e mbeturinave me Bankën Gjermane për Zhvillim – KfW.
Ajo e ka akuzuar ministrin e Financave, Hekuran Murati, për mosnënshkrimin e marrëveshjes që do të mundësonte blerjen e rreth 100 kamionëve të rinj dhe 10 mijë kontejnerëve për rajonin e Prishtinës.
Në një konferencë për media, Musmurati theksoi se qytetarët po përballen me një situatë të rënduar të mbeturinave, ndërsa ndërmarrja “Pastrimi” ka vetëm 12 kamionë funksionalë për pastrimin e qytetit.
Pavarësisht mbështetjes financiare nga Gjermania dhe kërkesave të vazhdueshme për finalizimin e projektit, bllokimi vazhdon për shkak të mosnënshkrimit të marrëveshjes së kredisë. “Ekziston vendimi i Qeverisë.
Ekziston dokumentacioni i projektit.
Pyetja për Hekuran Muratin është e thjeshtë: pse nuk po e nënshkruani?
Pse po e bllokoni blerjen e 100 kamionëve e kontejnerëve për Prishtinën?”, deklaroi Musmurati.
Ajo sqaroi se procesi ka filluar në maj të vitit 2023, ndërsa në tetor të atij viti është arritur marrëveshja fillestare ndërmjet palëve.
Faza e parë e projektit parashikon 4.1 milionë euro grant nga Qeveria Gjermane dhe 20 milionë euro kredi të butë, me një periudhë shlyerjeje 38-vjeçare, gjashtë vite pa pagesë të principalit dhe një normë interesi prej 0.75 për qind.
Kjo fazë do të mbulojë rreth 10.3 milionë euro për blerjen e rreth 100 kamionëve të rinj, 5.1 milionë euro për 10 mijë kontejnerë për ndarjen e mbeturinave dhe 1 milion euro për platformat e kontejnerëve, përveç konsulencës dhe përgatitjeve për investime.
Faza e dytë parashikon edhe 50 milionë euro kredi për kamionë dhe kontejnerë shtesë, si dhe ndërtimin e qendrave të kompostimit dhe riciklimit.
Musmurati theksoi se ky projekt është kyç për përmirësimin e menaxhimit të mbeturinave në Prishtinë dhe komunat përreth.
Pas negociatave ndërqeveritare të prillit 2024, KfW-ja njoftoi në shtator të atij viti miratimin e projektit nga Qeveria Gjermane dhe i dërgoi Qeverisë së Kosovës draft-marrëveshjet për grantin dhe kredinë.
Më 18 dhjetor 2024, Qeveria e Kosovës miratoi në parim nismën për marrëveshjen e kredisë dhe obligoi Ministrinë e Financave për hapat e nevojshëm.
Megjithatë, sipas nënkryetares, marrëveshja mbeti e panënshkruar edhe gjatë vitit 2026.
Musmurati njoftoi se më 15 maj 2026, Kryeqyteti, ndërmarrja “Pastrimi” dhe KfW-ja i janë drejtuar ministrit Murati me një shkresë të përbashkët, duke kërkuar trajtim prioritar të projektit dhe përshpejtim të procedurave për finalizimin e marrëveshjes. “Kjo nuk është vetëm kërkesë e Komunës. Është një shkresë e përbashkët, e nënshkruar nga të tri palët.
Dokumenti është dorëzuar dhe është protokolluar në Ministrinë e Financave.
Asnjëherë nuk kemi marrë përgjigje”, theksoi ajo.
Musmurati shtoi se angazhimet kanë vazhduar me takime gjatë qershorit, duke përfshirë një takim të KfW-së me ministrin Murati më 25 qershor 2026.
Sipas saj, edhe gjatë takimit të javës së kaluar, delegacioni i bankës gjermane konfirmoi se marrëveshja e kredisë ende nuk është nënshkruar.
Musmurati e cilësoi këtë vonesë si bllokim politik, dhe pasojat e kësaj situate po i bartin qytetarët, të cilët po përballen me mungesën e kapaciteteve të nevojshme për grumbullimin e mbeturinave. “Çfarë faji kanë qytetarët e Prishtinës që po i ndëshkoni me mosnënshkrim të marrëveshjes që ua mundëson heqjen e mbeturinave nga pragu i derës?”, pyeti ajo.
Në përfundim, nënkryetarja Musmurati kërkoi nga ministri Hekuran Murati një shpjegim publik për mosnënshkrimin dhe një përshpejtim të procesit për finalizimin e marrëveshjes, në mënyrë që të fillojnë procedurat për blerjen e kamionëve, kontejnerëve dhe realizimin e investimeve të parapara.
Burimi origjinal i informacionit: zeri .info
