Presidenti i deritanishëm i Serbisë dhe lideri i Partisë Përparimtare Serbe (SNS), Aleksandar Vuçiq, ka hedhur akuza ndaj lëvizjes studentore, duke pretenduar se ajo po kryen përndjekje politike dhe ushtrohet presion mbi institucionet, vetëm pesë ditë pas humbjes së tij në zgjedhjet parlamentare.
Në një intervistë për televizionin Informer, Vuçiqi ka komentuar humbjen zgjedhore, zhvillimet politike pas saj dhe pasojat ekonomike që mund të ndodhin, duke njoftuar se tri fabrika kanë paralajmëruar largimin nga Serbia. “Me siguri, kjo është mbrëmja kur e kam më së vështiri të flas.
Gjithmonë kam ndier mirë te ju në Informer, por sonte erdha me një lak në fyt”, tha ai në fillim të intervistës.
Vuçiqi tregoi se rezultatet e para të zgjedhjeve filluan të mbërrinin rreth orës 20:00 dhe, pasi kuptoi se lista e tij po humbiste, i telefonoi bashkëpunëtorët e afërt për t’i njoftuar se do ta pranonte publikisht humbjen.
Ai theksoi se politikanët duhet të dinë të pranojnë humbjen dhe t’i urojnë kundërshtarët për fitoren, duke pretenduar se pranimi i rezultateve nga ana e tij ndihmoi në ruajtjen e stabilitetit në Serbi.
Ai gjithashtu kritikoi Listën Studentore, e cila fitoi zgjedhjet parlamentare, duke e akuzuar për presion politik dhe shkelje të sundimit të ligjit.
Vuçiqi pretendoi se përfaqësuesit e Listës Studentore po ushtrojnë presion mbi policinë, prokurorinë dhe institucione të tjera, duke u përpjekur të frikësojnë anëtarët e SNS-së.
Ai kritikoi gjithashtu veprimet policore ndaj anëtarëve të partisë së tij në Sremska Mitrovicë dhe vende të tjera, duke i cilësuar ato si përndjekje politike.
Në anën tjetër, ai shprehu shqetësimin për mungesën e hapësirës në transmetuesin publik RTS, të cilin e akuzoi për anshmëri politike dhe për emërime të personave të afërt me pushtetin e ri.
Në zgjedhjet e parakohshme parlamentare të 25 tetorit, Lista Studentore arriti të fitojë shumicën e votave, duke i dhënë fund dominimit shumëvjeçar të SNS-së në politikën serbe.
Sipas rezultateve preliminare, Lista Studentore fitoi 52,71 për qind të votave dhe 140 nga 250 ulëset në Kuvend, ndërsa lista e udhëhequr nga Vuçiqi mori 39,17 për qind të votave dhe 104 mandate.
Lista Studentore u formua pas lëvizjes protestuese studentore që u zhvillua pas shembjes së strehës së stacionit hekurudhor në Novi Sad në nëntor të vitit 2024, ku humbën jetën 16 persona.
