Interi dhe Milani kanë prezantuar planet për ndërtimin e stadiumit të ri në zonën e San Siros, me një kapacitet prej 71 mijë e 500 ulësesh dhe një dizajn modern, që ka për synim ta shndërrojë arenën në një prej stadiumeve më të veçanta në Evropë.
Stadiumi i ri do të quhet “Generali Stadium”, pasi të drejtat e emrit i janë shitur kompanisë italiane të sigurimeve Generali.
Ky projekt është hartuar nga studiot e arkitekturës Foster+Partners dhe MANICA, nën drejtimin e Norman Foster dhe David Manica, të cilët kanë bashkëpunuar edhe në projektimin e versionit të ri të stadiumit Wembley në Londër.
Projektin e prezantuan në Castello Sforzesco në Milano, duke shënuar një hap të rëndësishëm pas më shumë se një dekade diskutimesh, pengesash dhe ndryshimesh në planet fillestare.
Elementi më i veçantë i stadiumit do të jetë struktura e jashtme në formë “X”, e frymëzuar nga katedralja ikonike Duomo e Milanos, e cila do të mbështesë çatinë me formë të dyfishtë të lakuar.
Tribunat do të ndahen në dy nivele, duke krijuar një hapësirë të vazhdueshme prej 360 gradësh dhe duke siguruar pamje të shkëlqyera nga çdo ulëse.
Stadiumi do të ketë gjithashtu dy sektorët karakteristikë të tifozëve: “Curva Nord” për mbështetësit e Interit dhe “Curva Sud” për tifozët e Milanit.
Të dy klubet e blenë tokën ku ndodhet edhe stadiumi aktual Giuseppe Meazza në nëntor të vitit 2025.
Megjithatë, pas vitesh bllokimesh dhe kundërshtimesh, projekti i ri pritet të hyjë në fazën e ndërtimit më vonë sesa ishte planifikuar fillimisht.
Punimet pritet të nisin në vitin 2028, ndërsa ndeshja e parë në stadiumin e ri synohet të zhvillohet gjatë sezonit 2031/32.
Objektivi është që arena të jetë në dispozicion edhe për ndeshjet e Kampionatit Evropian 2032, të cilin Italia do ta organizojë së bashku me Turqinë.
Sipas raportimeve, marrëveshja për të drejtat e emrit me kompaninë Generali mund të kapë vlerën e 26 milionë eurove në vit për një periudhë 25-vjeçare, duke sjellë të ardhura të përgjithshme prej rreth 650 milionë eurosh nëse konfirmohen këto shifra.
Në garat evropiane, stadiumi do të përdorë emrin “Milano Stadium”.
Projekti nuk përfshin vetëm ndërtimin e arenës së re, por edhe rigjenerimin urban të një hapësire prej 281 mijë metrash katrorë, ku parashihen zona të gjelbra, hapësira publike, vende për argëtim dhe destinacione tregtare.
