Kryetari i Nismës Socialdemokrate, Fatmir Limaj, ka shprehur shqetësimin e tij në lidhje me vrasjen e Arlinda Zekajt, duke vënë në pikëpyetje reagimin e institucioneve dhe menaxhimin e rasteve të dhunës në familje.
Limaj theksoi se ngjarja e Arlindës tregon se diçka ka dështuar në sistem, dhe kërkoi përfshirjen e psikologëve kur viktimat kërkojnë ndihmë në polici disa herë. “Ku janë qendrat tona sociale, a ka psikologë?
Në stacionin e policisë lajmërohet 2-3 herë për dhunën, a ka psikologë që e ka policia obligim me thirrë psikologun?”, u shpreh Limaj.
Ai theksoi se është e domosdoshme një qasje më e koordinuar mes policisë dhe shërbimeve sociale, sidomos në situatat kur ka raportime të përsëritura që mund të tregojnë për rrezik të shtuar për viktimat.
Rasti i Arlinda Zekajt, e cila u vra më 25 tetor në Vitomiricë të Pejës, ka shkaktuar reagime të forta dhe kërkesa për llogaridhënie nga institucionet.
Sipas gjetjeve preliminare të Inspektoratit Policor të Kosovës, urdhri mbrojtës i lëshuar më 16 tetor ishte ekzekutuar me gjashtë ditë vonesë, ndërsa një kërkesë nga një hetues për një vlerësim të rastit dhe asistencë shtesë nuk ishte trajtuar nga zinxhiri komandues.
Për këtë rast janë suspenduar 11 zyrtarë policorë në Pejë, ndërsa Këshilli Prokurorial i Kosovës ka suspenduar edhe kryeprokuroren e Pejës dhe prokuroren që ishte e angazhuar me rastin.
Hetimet dhe procedurat përkatëse kanë për qëllim të sqarojnë përgjegjësitë individuale dhe institucionale.
Burimi origjinal i informacionit: zeri .info
