Kryeministri i Shqipërisë, Edi Rama, ka reaguar pas plagosjes së një protestuesi nga Elbasani gjatë protestës së fundit në Tiranë, duke theksuar se është angazhuar personalisht për sigurimin e trajtimit të tij mjekësor në Itali.
Në një postim në rrjetet sociale, Rama shprehu keqardhje për lëndimin e të riut, por gjithashtu kritikoi organizatorët dhe nxitësit e dhunës, duke i bërë përgjegjës për pasojat që mund të sjellin protestat e dhunshme. “Më vjen shumë keq kur kushdoqoftë lëndohet fizikisht, qoftë edhe një protestues i dhunshëm, por si mund të shmanget çdo lëndim i mundshëm nëse dhuna e dikton natyrën e një proteste?!”, ka shkruar ai.
Ai njoftoi se është angazhuar për sigurimin e trajtimit të të riut në një spital në Itali, si dhe për transportin e tij me avion mjekësor. “Pasi jam marrë personalisht që mbrëmë me sigurimin e kurimit të djalit në spitalin më të mirë të Italisë, si edhe të transportit me një avion charter mjekësor”, ka deklaruar kryeministri.
Një 28-vjeçar, i plagosur në protestë, ka rrëfyer se “Plumbin e kam ende në sy” para nisjes drejt Italisë.
Rama gjatë reagimit të tij kritikoi ata që, sipas tij, po e përdorin plagosjen e të riut për të nxitur më tej tensionet politike. “Ju jeni errësira që i mbylli atij djali dritën e syrit”, ka shkruar ai, duke iu drejtuar atyre që i cilëson si nxitës të dhunës.
Ai gjithashtu akuzoi kundërshtarët e tij se po e shfrytëzojnë rastin për të nxitur urrejtje dhe përplasje. “Ju jeni gishtat dhe thonjtë e dorës së mallkimit që e përndjek Shqipërinë qysh në 1912-ën, duke ia mbyllur sytë sa herë ky vend e ky popull sheh dritë!”, ka theksuar ai.
Rama pretendoi gjithashtu se në protestat e dhunshme ka individë që nxisin dhe financojnë pjesëmarrjen në akte të dhunshme, përfshirë edhe të mitur.
Në përfundim të reagimit, kryeministri theksoi se nxitësit e dhunës nuk do të arrijnë qëllimet e tyre.
Reagimi i tij erdhi pas protestës në Tiranë, e cila u shoqërua me përplasje dhe akte dhune, duke përdorur këtë rast për të përsëritur thirrjen kundër dhunës dhe për të drejtuar akuza ndaj atyre që i konsideron përgjegjës për nxitjen e saj.
Burimi origjinal i informacionit: zeri .info
