Një tragjedi e rëndë ka ndodhur në Filipine, ku dy avionë ushtarakë stërvitorë janë përplasur në ajër gjatë një fluturimi stërvitor, duke shkaktuar vdekjen e katër pilotëve, njoftuan Forcat Ajrore të këtij vendi.
Aksidenti u regjistrua pasditen e së premtes, në bazën ajrore Fernando, në qytetin Lipa, në provincën Batangas, në jug të kryeqytetit Manila.
Sipas të dhënave të publikuara nga autoritetet ushtarake, në stërvitje ishin angazhuar dy avionë me një motor dhe helikë, të tipit SF-260, të cilët u përplasën teksa fluturonin në lartësi të ulët.
Të dy avionët përfunduan në tokë brenda perimetrit të bazës ushtarake.
Të katër pilotët që ndodheshin në dy avionët humbën jetën.
Edhe pse aksidenti ishte i madh, fatmirësisht nuk pati persona të tjerë të lënduar apo viktima në tokë.
Zëdhënësi i Forcave Ajrore të Filipineve, koloneli Alvin Jay Capingian, konfirmoi incidentin dhe njoftoi se shërbimet e emergjencës u aktivizuan menjëherë pas rrëzimit. “Të dy avionët u rrëzuan brenda perimetrit të bazës, pa u raportuar viktima të tjera”, tha ai në deklaratën e tij.
Autoritetet ushtarake konfirmuan vdekjen e katër pilotëve, por fillimisht nuk ndanë identitetet e tyre, duke kërkuar respektimin e privatësisë së familjeve të viktimave.
