Informohu për Gjobat dhe Masat në Trafik me e-Kosova

Qytetarët e Kosovës tani kanë një mundësi më të lehtë për t’u informuar rreth gjobave dhe masave në trafik falë integrimit të platformës shtetërore e-Kosova me Sistemin Informativ të Policisë së Kosovës.

Sipas njoftimit nga Policia e Kosovës, ky shërbim i ri u ofron qytetarëve mundësinë për të marrë njoftime për gjobat në trafik përmes platformës e-Kosova dhe mesazheve SMS, menjëherë pas regjistrimit të gjobës në sistem.

Përveç njoftimeve, platforma ofron qasje në informacione më të detajuara lidhur me gjobat dhe masat mbrojtëse të regjistruara.

Një tjetër funksion i rëndësishëm i këtij shërbimi është që pronarët e bizneseve mund të shohin drejtpërdrejt në e-Kosova raportin për gjendjen e gjobave.

Raporti përfshin informacione për gjobat e papaguara, masat mbrojtëse ndaj personave fizikë, duke përfshirë konfiskimin ose anulimin e patentë-shoferit, si dhe pikët negative në trafik, bazuar në të dhënat e regjistruara në sistem.

Sipas Policisë së Kosovës, ky integrim ka si qëllim të lehtësojë qasjen në informacione, të rrisë transparencën dhe të përmirësojë komunikimin ndërmjet institucioneve dhe qytetarëve.

Policia u ka bërë thirrje qytetarëve që ta shfrytëzojnë platformën e-Kosova për t’u informuar rreth gjobave dhe masave në trafik.

Burimi origjinal i informacionit: zeri .info