Naim Rashiti, drejtor i Grupit Ballkanik për Politika, ka kërkuar nga Qeveria e Kosovës që të ndajë 100 milionë euro për mobilizimin e ekspertizës dhe mekanizmave të specializuar ndërkombëtarë në lidhje me proceset në Dhomat e Specializuara.
Sipas tij, është e nevojshme që Kosova të ketë një strategji institucionale që e kalon thjesht ndryshimin e ligjeve dhe reagimet politike.
Në një intervistë, Rashiti theksoi se ky angazhim duhet të përfshijë ekspertë ndërkombëtarë të besueshëm, konferenca, tryeza dhe komunikim të drejtpërdrejtë me qeveritë perëndimore. “Ky vend duhet t’i ndajë që sot, kjo qeveri, 100 milionë euro për t’i mobilizuar të gjithë mekanizmat e specializuar ndërkombëtarë, për ta luftuar thelbin e çështjes”, ka deklaruar ai.
Ai ka lidhur propozimin e tij me nevojën për të shqyrtuar dhe paraqitur ndërkombëtarisht pretendimet për shkelje të konventave dhe standardeve ndërkombëtare nga Dhomat e Specializuara.
Rashiti kritikoi funksionimin e gjykatës duke pretenduar se ka pasur mungesë llogaridhënieje dhe shmangie nga normat ndërkombëtare.
Sipas tij, këto kritika duhet të mbështeten dhe të argumentohen përmes ekspertëve dhe institucioneve të specializuara.
Ai theksoi se financimi që propozon nuk duhet të kufizohet vetëm në mbështetje të mbrojtjes në proceset gjyqësore në Hagë, por duhet të shërbejë edhe për një angazhim më të gjerë ndërkombëtar. “Nuk e kalon këtë me 10 milionë, 20 milionë”, ka thënë ai, duke kërkuar një buxhet më të konsiderueshëm për këtë strategji.
Rashiti sugjeroi krijimin e një grupi punues institucional dhe politik, ku të përfshihen individë me përvojë nga subjektet e tjera politike.
Ai theksoi se Kosova duhet të angazhojë mekanizma dhe ekspertë të specializuar në të drejtën ndërkombëtare, përfshirë qendra ku ndërthuren puna akademike dhe ekspertiza praktike.
Ai përmendi institucione dhe grupe ekspertësh në Holandë, Angli, Gjenevë dhe Nju Jork si mundësi për të ndërtuar një argumentim të besueshëm rreth shqetësimeve që lidhen me proceset në Dhomat e Specializuara. “Kjo bëhet me tryeza, konferenca të mëdha ndërkombëtare.
Kjo bëhet me lobim, shpjegim të qartë për qeveritë perëndimore”, ka thënë Rashiti.
Ai e vlerësoi mobilizimin qytetar si të rëndësishëm, por theksoi se duhet të shoqërohet me investim institucional dhe punë të vazhdueshme me ekspertizën ndërkombëtare. “Reagimi ka qenë i vonshëm nga të gjitha palët”, theksoi ai.
Rashiti kritikoi vonesën e institucioneve dhe partive politike në trajtimin e kësaj çështjeje, duke theksuar se përgjegjësia nuk i takon vetëm Qeverisë aktuale, pasi gabime janë bërë që nga procesi i themelimit të gjykatës. “Absolutisht e vonshme, nga të gjitha palët”, ka thënë ai për reagimin e Kosovës.
Duke folur për ndryshimet në Ligjin për Dhomat e Specializuara, Rashiti e përshkroi çështjen si komplekse dhe theksoi se nuk merr përsipër të japë interpretim juridik të tyre.
Megjithatë, ai kërkoi shfrytëzimin e instrumenteve të mundshme, krahas ndërtimit të një strategjie më të gjerë.
Sipas tij, institucionet tani duhet të konsolidojnë reagimin dhe argumentimin e Kosovës përmes ekspertizës ndërkombëtare, me burime financiare dhe koordinim politik. “Ideja është si ta konsolidojmë reagimin dhe shpjegimin”, ka përfunduar Rashiti.
Burimi origjinal i informacionit: zeri .info
