Deputeti i Lëvizjes Vetëvendosje, Fahrush Rexhepi, ka reaguar pas një incidenti që ndodhi sot pas përfundimit të seancës së Kuvendit të Kosovës, teksa po largohej nga objekti i Kuvendit.
Rexhepi, i cili u kthye përballë protestuesve në oborrin e Kuvendit, theksoi se përballej me një “akt të turpshëm dhe të papranueshëm” nga disa protestues të mbledhur para Kuvendit.
Ai shpjegoi se reagimi i tij nuk lidhet vetëm me pozitën e deputetit, por edhe me historinë e tij dhe të familjes së tij në luftën e UÇK-së dhe rrugën drejt lirisë së Kosovës. “Ajo që ndodhi sot më dhemb jo vetëm për atë që më ndodhi mua, por sepse akte të tilla nuk i bëjnë nder as Kosovës, as sakrificës së popullit tonë dhe as vlerave për të cilat luftuam,” theksoi Rexhepi.
Sipas tij, një sjellje e tillë nuk u bën nder as personave që aktualisht po përballen me procesin gjyqësor në Hagë.
Rexhepi informoi se disa prej personave të identifikuar pas incidentit i kanë kërkuar takim për t’i kërkuar falje, por theksoi se kërkimfalja nuk e mbyll rastin. “Edhe urdhërdhënësi i sulmit tash veç se dihet,” shprehu ai, pa dhënë më shumë detaje.
Deputeti i LVV-së njoftoi se rastin do ta procedojë në organet kompetente të rendit dhe drejtësisë së Kosovës.
Deklarata e tij vjen në një kohë kur në Prishtinë po zhvillohet një protestë pranë institucioneve shtetërore, gjatë së cilës Policia e Kosovës ka raportuar për përleshje dhe hedhje të mjeteve të ndryshme në drejtim të institucioneve dhe zyrtarëve policorë.
Burimi origjinal i informacionit: zeri .info
