Rita Ora në Betejë Ligjore me Ish-Menaxheren e Saj për 3.74 Milionë Euro

Rita Ora po përballet me një betejë ligjore me ish-menaxheren e saj, Sarah Stennett, e cila kërkon më shumë se 3 milionë funte (rreth 3.74 milionë euro), duke pretenduar se kompanisë së saj i detyrohen të ardhura nga puna e këngëtares në turne dhe televizion.

Në vitin 2024, u raportua se Stennett dhe Rita kishin ndërprerë bashkëpunimin profesional.

Fillimisht, ndarja e tyre dukej relativisht miqësore, por situata tani ka marrë një kthesë ligjore.

Sarah Stennett, menaxherja që e ka udhëhequr Ritën që nga nënshkrimi i kontratës me kompaninë e saj në vitin 2009, ka paraqitur dokumente në Gjykatën e Lartë në Londër.

Në këto dokumente, ajo pretendon se kompania e saj, FAE Ventures, i detyrohet të paktën 3.2 milionë funte (rreth 3.74 milionë euro).

Sipas dokumenteve, Rita dyshohet se ka shkelur kushtet e kontratës duke mos i paguar kompanisë pjesën e saj të të ardhurave nga turnetë dhe angazhimet televizive.

Pjesa më e madhe e shumës së pretenduar, më shumë se 1.7 milionë funte (rreth 1.99 milionë euro), lidhet me ato që FAE Ventures i konsideron si “zbritje të palejueshme” për shërbime profesionale, përfshirë reklamat, kontabilitetin dhe sigurimet.

Por pretendimet nuk përfundojnë këtu.

Ish-menaxherja po ashtu pretendon se më shumë se 1.1 milionë funte (rreth 1.29 milionë euro) nuk janë deklaruar siç duhet, duke iu referuar të ardhurave nga turneu i Ritës në periudhën nga pranvera e vitit 2019 deri në vitin 2020, përfshirë “Phoenix World Tour”, i cili përfshinte shtatë koncerte në Mbretërinë e Bashkuar, përfshirë një performancë në O2 Arena të Londrës.

Dokumentet tregojnë se pagesat e komisioneve për FAE Ventures “nuk përfshinin disa të ardhura nga turneu” që Rita kishte marrë ose që ishin marrë në emër të saj gjatë kësaj periudhe.

Po ashtu, sugjerohet se deri në 6 milionë funte (rreth 7 milionë euro) të ardhura nga këto koncerte dyshohet se nuk ishin pasqyruar në deklaratat financiare të paraqitura.

Angazhimet televizive të këngëtares gjithashtu janë përfshirë në këtë betejë ligjore.

Kompania e Stennett pretendon se të ardhurat e Ritës nga puna si anëtare e jurisë në “The Masked Singer” nuk janë raportuar saktë.

Sipas pretendimit, komisionet për sezonin e pestë të emisionit të njohur të ITV-së janë paguar bazuar në fatura që “nuk pasqyronin saktë shumat” që Rita kishte të drejtë t’i merrte sipas kontratës.

Stennett, e cila ka kontribuar gjithashtu në zhvillimin e karrierës së këngëtareve si Ellie Goulding dhe Jessie J, pretendon se kjo situatë i ka shkaktuar kompanisë së saj një humbje prej afro 25 mijë funtesh (rreth 29 mijë euro).

Kjo përbën një përfundim të hidhur të një marrëdhënieje profesionale që për vite me radhë ishte e suksesshme dhe ndihmoi në ndërtimin e karrierës ndërkombëtare të Ritës.

Pas përfundimit të bashkëpunimit mes tyre, kompania e Stennett kishte kërkuar të shqyrtonte librat financiarë të këngëtares, për shkak të mospërputhjeve të pretenduara.

Kompania e specializuar e kontabilitetit muzikor, Y Royalties, ka audituar gjashtë vite të deklaratave financiare të Ritës, nga korriku i vitit 2018 deri në qershor të vitit 2024.

Sipas ekipit të Stennett, gjatë këtij procesi janë dorëzuar “disa, por jo të gjitha” dokumentet e kërkuara.

Një burim ka thënë se Sarah Stennett dhe kompania e saj kërkojnë atë që besojnë se u takon sipas marrëveshjes. “Është për të ardhur keq që gjërat kanë arritur deri këtu”, ka deklaruar burimi.

Burimi origjinal i informacionit: telegrafi .com