Deputeti i Partisë Demokratike të Kosovës (PDK), Altin Krasniqi, ka reaguar pas deklaratës së votuar të hënën në Kuvendin e Kosovës lidhur me aktgjykimin e Dhomave të Specializuara në Hagë.
Krasniqi, që është edhe djali i ish-kryetarit të Kuvendit dhe njërit prej ish-drejtuesve të UÇK-së, Jakup Krasniqi, e vlerëson deklaratën si një nismë të mirë, por thekson se ajo nuk është e mjaftueshme pa miratimin e një ligji për Gjykatën Speciale. “Deklarata e votuar sot në Kuvend është një nismë e mirë, por pa u votuar ligji për Gjykatën Speciale, nuk është bërë asgjë konkrete,” ka shkruar Krasniqi.
Ai shton se mbrojtja e UÇK-së duhet të ndodhë përmes veprimeve konkrete dhe vendimeve institucionale. “UÇK-ja mbrohet me veprime konkrete dhe me vendime që e mbrojnë luftën e saj të drejtë dhe vlerat e saj,” ka deklaruar ai.
Krasniqi gjithashtu përmend se qytetarët e Kosovës e kanë të qartë qëndrimin e tyre për luftën e UÇK-së. “Qytetarët e Kosovës e dinë dhe e kanë ditur gjithmonë se UÇK-ja ka bërë një luftë të drejtë për lirinë e Kosovës,” ka shkruar deputeti i PDK-së.
Burimi origjinal i informacionit: zeri .info
