Arrestimi i Susan Sarandon dhe Hannah Einbinder gjatë protestave në Nju Jork
Policia e Nju Jorkut arrestoi fituesen e çmimit Oscar, Susan Sarandon, dhe aktoren Hannah Einbinder të enjten gjatë një operacioni kundër protestave që ishin organizuar për të kundërshtuar kryeministrin izraelit, Benjamin Netanyahu.
Pamjet filmike tregojnë anëtarët e Departamentit të Policisë së Nju Jorkut (NYPD) duke vënë prangat Sarandonit në një protestë teksa kryeministri izraelit përgatitej për fjalimin e tij në Asamblenë e Përgjithshme të Kombeve të Bashkuara.
Sipas informacioneve, policia e ka larguar edhe aktoren Hannah Einbinder nga protesta, e cila ishte organizuar nga grupi “Zëri Hebraik për Paqe”.
Demonstruesit që ishin mbledhur mbanin pankarta me mesazhe si “Ndalo armatosjen e Izraelit” dhe “Ndalo gjenocidin”.
Një zëdhënëse e NYPD tha se oficerët reaguan ndaj një raporti për një “demonstrim të panjoftuar” ku turma kishte bllokuar një kryqëzim. “Anëtarët e Byrosë u dhanë paralajmërime pjesëmarrësve që të largoheshin nga vendi.
Për shkak se ata vazhduan me bllokadën, u arrestuan më shumë njerëz që nuk iu bindën urdhrit”, tha zëdhënësja, pa specifikuar numrin e saktë të të arrestuarve.
Mes të arrestuarve ishin edhe Darializa Avila Chevalier, kandidatja e Partisë Demokratike për në Kongres, si dhe anëtarja e Këshillit të Qytetit të Nju Jorkut, Chi Ossé.
Ndërkohë, brenda sallës së Asamblesë së Përgjithshme të OKB-së, ku zhvilloheshin protestat, diplomatë të shumtë nga e gjithë bota u larguan nga salla kur Netanyahu filloi fjalimin e tij.
Për Susan Sarandon, kjo nuk është hera e parë që ajo merr pjesë në protesta kundër luftës në Gaza.
Aktorja amerikane u tha gazetarëve në Festivalin e Filmit në Venecia se po humbet angazhime për shkak të pikëpamjeve të saj të shprehura publikisht. “Kohët e fundit, më janë hequr përsëri vende pune sepse ka agjenci që i këshillojnë njerëzit të mos më punësojnë.
Por kjo është struktura e pushtetit”, tha Sarandon, “Mendoj se ka pasur një ndryshim në kuptimin e situatës në publikun e gjerë, por ende ka qëndrime të forta sioniste në industrinë time dhe ata njerëz nuk e kanë zbutur qëndrimin e tyre ndaj meje.
Megjithatë, e kam gjetur komunitetin tim dhe jam mirë”.
Burimi origjinal i informacionit: telegrafi .com
