Në akademinë përkujtimore të mbajtur për nder të trevjetorit të rënies në krye të detyrës të rreshterit të Policisë së Kosovës, Afrim Bunjaku, ushtruesja e detyrës së presidentes, Albulena Haxhiu, kujtoi sulmin e armatosur në Banjskë të Zveçanit më 24 shtator 2023.
Haxhiu theksoi se sulmi ndaj Policisë së Kosovës nuk ishte një incident i zakonshëm, por një aksion i përgatitur paraprakisht nga një grup i organizuar dhe i armatosur rëndë.
Ajo theksoi se institucionet e Kosovës kanë paraqitur dëshmi se anëtarët e grupit ishin trajnuar dhe përgatitur në Serbi, ndërsa një pjesë e madhe e armatimit dyshohet se kishte ardhur nga Serbia. “Synimi nuk ishte vetëm sulmi ndaj Policisë së Kosovës, por shkëputja e një pjese të territorit të Republikës së Kosovës dhe bashkimi i saj me Serbinë,” deklaroi Haxhiu.
Ajo vlerësoi se reagimi i Policisë së Kosovës kishte parandaluar marrjen nën kontroll të territorit në veri dhe kishte penguar realizimin e këtij synimi.
Haxhiu kujtoi momentet e para të sulmit, kur Afrim Bunjaku dhe kolegët e tij u nisën drejt Banjskës pas raportimit se hyrja e fshatit ishte bllokuar me dy kamionë.
Sipas rrëfimit të saj, kur policët arritën te bllokada, Bunjaku nuk lejoi kolegët më të rinj të dilnin të parët, por mori vetë pozicionin në krye.
Në atë moment shpërtheu një mjet eksploziv, duke plagosur Bunjakun dhe policin Alban Rashiti.
Më pas, ndaj pjesëtarëve të Policisë së Kosovës u hap zjarr.
Nën të shtëna, polici Mirsad Kryeziu arriti ta tërhiqte Bunjakun nga vendi ku kishte mbetur i plagosur.
Rreshteri Afrim Bunjaku ndërroi jetë në krye të detyrës. “Afrim Bunjaku ra atë mëngjes në krye të detyrës, por plani për të cilin ishte përgatitur ai sulm dështoi,” tha Haxhiu.
Ajo theksoi se pjesëtarët e Policisë së Kosovës vazhduan operacionin dhe arritën ta merrnin situatën nën kontroll, duke penguar grupin e armatosur që të merrte nën kontroll territorin në veri.
Në fjalimin e saj, Haxhiu iu referua edhe procesit gjyqësor për rastin e Banjskës.
Ajo tha se në prill të këtij viti, Gjykata Themelore në Prishtinë kishte shpallur fajtorë në shkallë të parë tre prej të akuzuarve, me dy prej tyre të dënuar me burgim të përjetshëm dhe një me 30 vjet burgim.
Haxhiu kërkoi nga partnerët ndërkombëtarë që të ushtrojnë presion ndaj Serbisë për dorëzimin e personave të kërkuar nga autoritetet e Kosovës, në mënyrë që të përballen me drejtësinë.
Ajo përmendi edhe Milan Radoiçiqin, të cilin e cilësoi si person përgjegjës për organizimin e sulmit dhe tha se ai vazhdon të jetë i lirë në Serbi. “Përgjegjësia nuk përfundon me tri dënime,” tha Haxhiu, duke përsëritur kërkesën e institucioneve të Kosovës për ndjekjen penale të të gjithë personave të dyshuar për përfshirje në sulm.
Në akademinë përkujtimore u vendos edhe gurthemeli i memorialit që do të ndërtohet në vendin ku Afrim Bunjaku humbi jetën.
Haxhiu tha se memoriali do të shërbejë për ruajtjen e kujtimit për rreshterin Bunjaku dhe për dokumentimin e ngjarjeve të 24 shtatorit 2023. “Afrim Bunjakun Kosova e kujton si policin që doli përpara kur Republika u sulmua dhe që ra duke mbrojtur vendin e vet,” deklaroi ajo.
Në përfundim të fjalimit, Haxhiu nderoi kujtimin e rreshterit të Policisë së Kosovës me fjalët: “Lavdi heroit të Kosovës, Afrim Bunjaku!” Burimi origjinal i informacionit: zeri .info
