Organizata Albanians for America (AFA) ka reaguar pas seancës dëgjimore të mbajtur sot në Kongresin e Shteteve të Bashkuara për situatën në Ballkanin Perëndimor, duke e vlerësuar si të rëndësishëm vëmendjen e shtuar të Uashingtonit ndaj zhvillimeve në rajon.
Në një deklaratë, AFA thekson se e ka ndjekur nga afër seancën, përfshirë përmes përfaqësuesve të saj që ishin të pranishëm fizikisht në Washington, D.C.
Kryetari i Nënkomitetit për Evropën dhe Evropën Qendrore, Keith Self, e hapi seancën duke e cilësuar paqëndrueshmërinë në Ballkanin Perëndimor si një çështje serioze për sigurinë kombëtare amerikane.
Ai gjithashtu iu referua drejtpërdrejt zhvillimeve që kishte parë gjatë vizitës së tij në rajon në muajin maj.
Në deklaratën e AFA-së veçohet qëndrimi i Self ndaj Serbisë.
Sipas organizatës, ai theksoi se qeveria serbe vazhdon të promovojë një narrativë të viktimizimit të bazuar në të kaluarën.
Self iu referua, ndër të tjera, refuzimit të Serbisë për të njohur pavarësinë e Kosovës dhe nderimit të personave të dënuar për krime lufte.
Ai ngriti gjithashtu shqetësime për ndikimin në rritje të Kinës dhe Rusisë në Serbi dhe pasojat që kjo mund të ketë për stabilitetin rajonal.
Një pjesë e rëndësishme e diskutimit, sipas AFA-së, ishte edhe situata e shqiptarëve etnikë në jug të Serbisë.
Sa i përket Kosovës, AFA e cilëson mesazhin e dhënë në seancë si të qartë.
Sipas organizatës, Keith Self e përshkroi Kosovën si një “partnere të pavarur, demokratike dhe strategjike të Shteteve të Bashkuara”.
Ai bëri thirrje që vendet anëtare të NATO-s që ende nuk e kanë njohur Kosovën ta bëjnë një gjë të tillë.
Self theksoi gjithashtu se integrimi i Kosovës në NATO është thelbësor për stabilitetin afatgjatë të Ballkanit Perëndimor, ndërsa nënvizoi rëndësinë e menjëhershme të vazhdimit të pranisë amerikane në kuadër të KFOR-it.
Edhe Departamenti i Shtetit, sipas AFA-së, rikonfirmoi se Shtetet e Bashkuara mbeten të përkushtuara ndaj pavarësisë dhe integritetit territorial të Kosovës.
Washingtoni konfirmoi gjithashtu se vazhdon diskutimet me aleatët e NATO-s që ende nuk e kanë njohur pavarësinë e Kosovës.
Gjatë seancës u ngritën edhe shqetësime për orientimin strategjik të Serbisë.
Duke iu përgjigjur kryetarit Self, zëvendësndihmës sekretari i Shtetit, Daniel Lawton, konfirmoi shqetësimin amerikan për blerjen nga Serbia të sistemeve kineze të mbrojtjes.
Sipas AFA-së, Lawton theksoi se Serbia është i vetmi shtet evropian që ka blerë sisteme të mbrojtjes ajrore nga Kina dhe paralajmëroi se një qasje e tillë mund ta komplikojë thellimin e bashkëpunimit të mbrojtjes mes SHBA-së dhe Serbisë.
Për Albanians for America, seanca e sotme dërgon një mesazh më të gjerë për rëndësinë e angazhimit të vazhdueshëm në Washington.
Organizata thekson se nga vizitat e kongresistëve në rajon, deri te seancat dëgjimore, legjislacioni dhe angazhimi i drejtpërdrejtë me politikëbërësit amerikanë, vëmendja ndaj Kosovës, të drejtave të shqiptarëve në Luginën e Preshevës dhe arkitekturës së ardhshme të sigurisë në Ballkanin Perëndimor është duke u rritur në Washington.
AFA ka falënderuar kryetarin Keith Self, anëtarin kryesor të pakicës në nënkomitet, Keating, si dhe anëtarët e nënkomitetit për vëmendjen e vazhdueshme ndaj rajonit. “AFA do të vazhdojë të jetë e pranishme, të ndërtojë marrëdhënie përtej linjave partiake dhe të punojë për të siguruar që perspektivat shqiptaro-amerikane të dëgjohen aty ku diskutohet politika e SHBA-së ndaj rajonit tonë”, përfundon deklarata.
Burimi origjinal i informacionit: zeri .info
