Ministria e Infrastrukturës dhe Transportit ka bërë të ditur se në ditën e enjte do të vendoset një kufizim i përkohshëm i qarkullimit për automjetet e transportit të mallrave me masë totale mbi 20 tonë në autoudhët e Kosovës.
Kjo masë do të jetë në fuqi nga ora 11:00 deri në 17:30 për shkak të temperaturave të larta që pritet të arrijnë 32 gradë Celsius ose më shumë.
Kufizimi vlen vetëm për autoudhët, ndërsa në rrugët nacionale, rajonale dhe lidhëse qarkullimi i automjeteve të rënda do të lejohet pa ndonjë kufizim.
Nga kjo masë përjashtohen automjetet e organeve të rendit dhe sigurisë publike, shërbimeve emergjente dhe institucioneve shëndetësore.
Ministria ka bërë thirrje për operatorët ekonomikë dhe drejtuesit e automjeteve të transportit të mallrave që të respektojnë kufizimin dhe të planifikojnë qarkullimin në përputhje me orarin e përcaktuar.
Burimi origjinal i informacionit: zeri .info
