Deputetja e zgjedhur e Lidhjes Demokratike të Kosovës (LDK), Hykmete Bajrami, ka reaguar pas aksidentit në një vendpunishte në Prishtinë, ku një punëtor humbi jetën dhe një tjetër u lëndua.
Bajrami ka thënë se ky rast është alarm për gjendjen e sigurisë në punë dhe ka kërkuar hetim të plotë nga institucionet përgjegjëse. ‘Vdekja e sotme e një punëtori në vendin e punës, në Prishtinë, është një tjetër alarm se siguria në punë vazhdon të mos trajtohet me seriozitetin e duhur. Çdo jetë e humbur në vendin e punës është një dështim i sistemit të mbikëqyrjes dhe zbatimit të ligjit,’ ka shkruar Bajrami.
Ajo ka kërkuar nga Inspektorati i Punës dhe institucionet tjera që të zhvillojnë hetim të plotë dhe transparent për rastin, si dhe të publikojnë gjetjet. ‘Kërkoj nga Inspektorati i Punës dhe institucionet e tjera përgjegjëse që të zhvillojnë një hetim të plotë dhe transparent për këtë rast, t’i bëjnë publike gjetjet dhe të ndërmarrin masa ndaj kujtdo që rezulton se ka shkelur ligjin,’ ka deklaruar deputetja e zgjedhur e LDK-së.
Bajrami ka shprehur ngushëllime për familjen e punëtorit që humbi jetën dhe ka uruar shërim për të lënduarit. ‘Ngushëllimet e mia të sinqerta për familjen e të ndjerit.
Të lënduarve u uroj shërim sa më të shpejtë,’ ka shtuar Bajrami.
Burimi origjinal i informacionit: zeri .info
