Presidenti i Shteteve të Bashkuara të Amerikës, Donald Trump, ka njoftuar emërimin e William “Bill” Pultes si ushtrues detyre i Drejtorit të Inteligjencës Kombëtare, duke ia besuar përkohësisht drejtimin e një prej institucioneve më të rëndësishme të sigurisë dhe inteligjencës në SHBA.
Lajmi u bë publik nga vetë Trump përmes rrjetit social Truth, ku theksoi se Pulte do të marrë drejtimin e komunitetit amerikan të inteligjencës, ndërsa në të njëjtën kohë do të vazhdojë të ushtrojë detyrën e drejtorit të Agjencisë Federale për Financimin e Strehimit (FHFA), si dhe të mbetet në krye të institucioneve hipotekare Fannie Mae dhe Freddie Mac.
Presidenti amerikan vlerësoi përvojën e Pultes në menaxhimin e sektorit të financimit të strehimit dhe mbikëqyrjen e tregjeve financiare, duke argumentuar se ai ka administruar përgjegjësi me vlerë prej më shumë se 10 trilionë dollarësh përmes Fannie Mae dhe Freddie Mac.
Emërimi i Pultes vjen pas vendimit të Tulsi Gabbard për t’u larguar nga posti i Drejtoreshës së Inteligjencës Kombëtare.
Gabbard kishte njoftuar në muajin maj se do të largohej nga detyra në fund të qershorit, duke përmendur gjendjen shëndetësore të bashkëshortit të saj si arsye kryesore të dorëheqjes.
Drejtoria e Inteligjencës Kombëtare ka përgjegjësinë për koordinimin e punës së 18 agjencive amerikane të inteligjencës, përfshirë CIA-n dhe NSA-n, duke luajtur një rol kyç në mbledhjen, analizimin dhe shpërndarjen e informacionit që lidhet me sigurinë kombëtare të ShBA-s.
Megjithatë, emërimi i Pultes ka tërhequr vëmendje edhe për faktin se ai nuk ka përvojë të drejtpërdrejtë në fushën e inteligjencës apo të sigurisë kombëtare.
Pavarësisht kësaj, Trump ka zgjedhur t’i besojë atij drejtimin e përkohshëm të institucionit në një periudhë që konsiderohet sfiduese për interesat strategjike amerikane.
Emërimi i tij vjen në një kohë kur ShBA-ja po përballet me sfida të shumta në arenën ndërkombëtare, përfshirë tensionet gjeopolitike, kërcënimet kibernetike dhe çështje të ndërlikuara të sigurisë globale, duke e bërë rolin e Drejtorit të Inteligjencës Kombëtare një nga pozitat më të rëndësishme në administratën amerikane.
