Mediat iraniane kanë raportuar se Teherani i ka pezulluar bisedimet me Shtetet e Bashkuara të Amerikës, në shenjë proteste ndaj veprimeve të Izraelit në Liban.
Agjencia e lajmeve Tasnim ka shkruar se armëpushimi në Liban ka qenë një prej kushteve për bisedimet SHBA-Iran.
Sipas kësaj agjencie, Teherani pretendon se me sulmet e fundit izraelite, armëpushimi është shkelur. “Ekipi negociator iranian po pezullon bisedimet dhe shkëmbimet e mesazheve përmes ndërmjetësve”, raportoi Tasnim.
Irani ka bërë thirrje për ndërprerjen e menjëhershme të luftërave të Izraelit në Gaza dhe Liban, së bashku me tërheqjen e plotë të ushtrisë izraelite nga Libani. “Derisa të përmbushet qëndrimi i Iranit dhe i rezistencës për këto çështje, nuk do të ketë negociata”, raportoi tutje Tasnim.
Sipas agjencisë iraniane, Teherani ka kërcënuar me mbylljen e plotë të Ngushticës së Hormuzit dhe aktivizimin e fronteve të tjera.
Siç raporton CNN, Shtëpia e Bardhë ende nuk e ka komentuar një zhvillim të tillë.
