Komisioni Qendror i Zgjedhjeve (KQZ) ka bërë të ditur se brenda tri ditëve ka arritur t’ua dërgojë pakot me fletëvotim mbi 85% të votuesve të regjistruar për votim përmes postës.
Zëdhënësi i KQZ-së, Valmir Elezi, ka thënë se nga rreth 105 mijë votues të regjistruar, mbi 90 mijë prej tyre kanë pranuar në adresat e tyre pakon me fletëvotim dhe materialet përcjellëse.
Procesi i votimit jashtë Kosovës ka nisur më 21 maj dhe do të përfundojë më 6 qershor 2026.
KQZ përmes operatorit ekonomik ka dërguar rreth 105 mijë pako individuale për votuesit e regjistruar.
Gjatë tre ditëve të para, janë shpërndarë mbi 90 mijë pako që përmbajnë fletëvotimin, udhëzuesin për votim, zarfin e fshehtësisë dhe zarfin kthyes.
Votuesit udhëzohen të ndjekin hapat për votim siç është plotësimi i fletëvotimit, vendosja në zarfin e fshehtësisë, vendosja e zarfit kthyes dhe dërgimi në postë.
KQZ ka ftuar votuesit që zarfi të arrijë në kutinë postare më së largu deri më 6 qershor 2026.
Numri i votuesve të regjistruar për votim jashtë Kosovës është 132,212 votues.
Sipas të dhënave, numri i shtetasve të Kosovës me të drejtë vote në këtë proces zgjedhor është 2,092,174 votues.
