Komisioneri i Bashkimit Evropian për Shëndetësi, Olivér Várhelyi, u përball me një protestë të papritur gjatë Samitit Evropian për Kancerin që po mbahej në Bruksel.
Dy aktivistë, në një veprim të guximshëm, u ngjitën në skenë dhe hodhën drejt tij një substancë të hirtë, që dukej si hi.
Ky incident ka shkaktuar një reagim të fortë nga presidentja e Komisionit Evropian, Ursula von der Leyen.
Ngjarja ndodhi të enjten, në momentin kur Várhelyi ishte duke u përgatitur për të mbajtur një fjalim mbi përpjekjet e Bashkimit Evropian për luftimin e kancerit.
Sipas pamjeve të publikuara, dy protestuesit u ngjitën papritur në skenë dhe hodhën një substancë pluhurore drejt komisionerit, në shenjë kundërshtimi ndaj ndryshimeve të propozuara në rregulloret evropiane për pesticidet.

