Jakup Krasniqi do të kalojë edhe sot kohën me familjen e tij, ndërsa vizita e tij ka filluar.
Ai u transferua sot nga selia e EULEX-it drejt shtëpisë së tij, nën masa të rrepta sigurie.
Policia e EULEX-it bllokoi përkohësisht rrugën, derisa autokolona që transportonte Krasniqin, e shoqëruar nga një autoambulancë, doli nga selia.
Krasniqi arriti dje në Kosovë për të vizituar bashkëshorten e tij, e cila raportohet se është e sëmurë.
Dhomat e Specializuara dje njoftuan se vizita e tij ka “arsye humanitare”. “Për momentin, e vetmja gjë që mund të them është se kjo erdhi si pasojë e arsyeve të forta humanitare.
Pala e akuzuar mund të paraqesë një kërkesë të tillë, siç e dini, dhe më pas gjyqtarët, duke u mbështetur në rregullat e gjykatës si dhe në të drejtën ndërkombëtare të të drejtave të njeriut, marrin një vendim me urgjencë dhe profesionalizëm,” tha zëdhënësi i DHS-së, Michael Doyle.
I pyetur se për sa ditë i është dhënë leja për qëndrim Krasniqit, Doyle tha: “ndoshta më vonë – siç ka ndodhur edhe në të kaluarën, pasi të jenë kryer vizitat – do të bëhen publike më shumë informacione, duke përfshirë ato në dokumentet gjyqësore.
Për momentin, nuk jam në gjendje të jap detaje të tilla operative.
Siç e përmenda, informacione të tilla zakonisht bëhen publike më vonë.
Nuk mund të jap më shumë informacione; mund të them vetëm se bëhet fjalë për arsye të forta humanitare.” Hera e fundit kur Krasniqi ishte në Kosovë, ishte tetori i vitit 2024.
Ai u dënua me 25 vjet burg në aktgjykimin e 16 shtatorit të këtij viti.
Burimi origjinal i informacionit: zeri .info

