Evropa ka përjetuar sezonin më intensiv të zjarreve në histori gjatë vitit 2025, me zjarre që kanë përfshirë më shumë se 1,07 milion hektarë në të gjithë Bashkimin Evropian (BE).
Kjo është konfirmuar në një raport të publikuar nga Qendra e Përbashkët Kërkimore (JRC) e Komisionit Evropian.
Sipas të dhënave të Sistemit Evropian të Informacionit për Zjarret në Pyje (EFFIS), i menaxhuar nga JRC-ja, sipërfaqja e djegur arriti në 1.079.538 hektarë, që është më shumë se dyfishi i mesatares 18-vjeçare prej 364.885 hektarësh.
Tri javët e para të gushtit përbënin afërsisht gjysmën e sipërfaqes së përgjithshme të djegur në BE, sipas raportit.
Zjarret në Mesdheun perëndimor përbënin 52 për qind të sipërfaqes së djegur në BE, ndërsa Spanja dhe Portugalia së bashku përbënin 63 për qind të totalit.
Në 46 vendet dhe territoret e monitoruara nga EFFIS në Evropë, Afrikën e Veriut dhe Lindjen e Mesme, gjithsej 23.180 zjarre përfshinë një sipërfaqe prej 2.242.195 hektarësh.
Kjo është 20 për qind më shumë se në vitin 2024 dhe pothuajse 2,5 herë më shumë se sipërfaqja e regjistruar në vitin 2023.
Të dhënat kombëtare nga 35 vende dhe territore treguan se Spanja, Portugalia, Italia dhe Greqia regjistruan më pak zjarre se zakonisht, por sipërfaqet e përfshira nga zjarret ishin më të mëdha.
Në nëntë vende, përfshirë Gjermaninë, Holandën dhe Norvegjinë, si numri i zjarreve, ashtu edhe sipërfaqja e djegur tejkaluan mesataren dhjetëvjeçare.
Gjysma e vendeve dhe territoreve që dorëzuan të dhëna kombëtare regjistruan shifra nën mesataren.
Estonia përjetoi sezonin me më pak zjarre që nga fillimi i raportimit të të dhënave në vitin 2000.
Në mars, në Mbretërinë e Bashkuar u regjistruan 220 zjarre në natyrë, ndërsa Holanda arriti nivelin më të lartë të rrezikut nga zjarret më 5 prill.
Suedia regjistroi nivele të larta të rrezikut nga zjarret që më 3 prill.

