Ish-zëvendëspresidentja amerikane, Kamala Harris, e cila po shihet si një nga kandidatët potencialë për zgjedhjet presidenciale të vitit 2028 në Shtetet e Bashkuara, do të realizojë një vizitë të shkurtër në Francë.
Gjatë kësaj vizite, ajo do të takohet me presidentin Emmanuel Macron.
Pallati Élysée ka njoftuar se takimi do të zhvillohet të premten në Paris.
Vizita e Harris vjen në një kohë kur marrëdhëniet mes presidentit francez Macron dhe homologut të tij amerikan, Donald Trump, janë të tensionuara.
Macron ka shprehur kritika ndaj luftës së SHBA-së dhe Izraelit kundër Iranit, si dhe ndaj luftës në Ukrainë.
Harris ka shërbyer si zëvendëspresidente e SHBA-së gjatë administratës së Joe Bidenit nga viti 2021 deri në vitin 2025.
Ajo u bë kandidate e Partisë Demokratike për presidente në zgjedhjet e vitit 2024, pasi Biden vendosi të tërhiqet nga gara për shkak të shqetësimeve për shëndetin e tij.
Megjithatë, edhe pse ka pësuar humbje përballë Donald Trumpit, Harris vazhdon të konsiderohet si një nga emrat më të mundshëm për kandidaturën demokrate në zgjedhjet presidenciale të vitit 2028.

